Bear Lake (Idaho–Utah)

Bear Lake
Die turkooisblou water van Bear Lake
Kaart van Bear Lake
Koördinate:	42°00′N 111°20′W / 42.000°N 111.333°W / 42.000; -111.333Koördinate: 42°00′N 111°20′W / 42.000°N 111.333°W / 42.000; -111.333
Ligging:	Bear Lake County, Idaho en Rich County, Utah, VSA
Soort:	Binnemeer
Oppervlakte:	280 km² (109 myl²)
Gemiddelde diepte:	29 m (94 vt)
Maksimum diepte:	310 m (1 020 vt)
Volume:	8,02 km³
Lengte:	29,5 km (18,3 myl)
Breedte:	11,4 km (7,1 myl)
Opvangsgebied:	23 727 km² (3 079 myl²)
Omtrek:	77 km (48 myl)
Invloei:	Creeks: Fish Haven, North Eden, South Eden, Swan Creek, St. Charles
Uitvloei:	Bear Lake Outlet Canal
Nedersettings:	Garden City (UT), Laketown (UT), Fish Haven (ID)

Bear Lake is 'n varswatermeer langs die grens tussen die deelstate Idaho en Utah in die weste van die Verenigde State, sowat 125 myl noord van Salt Lake City en 40 myl noordoos van Logan in die suidelike gedeelte van die Bear Lake Valley geleë. Bear Lake het 'n oppervlakte van 109 vierkante myl (280 km²) wat ongeveer eweredig verdeel is oor die twee deelstate. Die meer strek van die administratiewe distrik Rich County in die noordooste van Utah tot Bear Lake County in die suidooste van Idaho. Toerisme-ontwikkeling het veral langs Utah se meeroewer plaasgevind.

Dikwels word na Bear Lake met sy sandstrande verwys as die Caribbean of the Rockies, 'n sinspeling op die meer se turkooisblou water wat baie op die kleur van die Karibiese See lyk. Die diep blou kleur is aan kalksteen uit die nabygeleë bergreeks Bear River Range te danke wat in die water opgelos is. Mikroskopies klein partikels wit kalsiumkarbonaat weerkaats die water se natuurlike blou kleur terug na die oppervlak.

Net soos die Karibiese Seegebied is ook Bear Lake ontsluit vir toerisme. Besoekers word dwarsdeur die jaar na die meer gelok en kan vir hul ontspanning gedurende die somermaande uit 'n groot verskeidenheid water- en hengelsportgeriewe kies. Sneeuval gedurende die wintermaande maak van die meer en sy omgewing daarnaas 'n gewilde wintersportbestemming. Bear Lake Valley is vanweë sy ligging van sowat 1 800 meter bo seevlak en die plaaslike mikroklimaat met warm dae en koel nagte 'n belangrike sentrum van die framboosbedryf. Die vrugteboorde van die vallei lewer danksy die optimale klimaattoestande frambose van hoë gehalte op. Gedurende die eerste week in Augustus vier die bewoners van Garden City teen die einde van oestyd hul framboosfees, die Raspberry Days, met onder meer rodeo's, optogte, vuurwerk, dansopvoerings, 'n framboos-kookwedstryd en konserte.

Die legende van die Bear Lake Monster fassineer toeriste net soos verhale van die Loch Ness-monster in Skotland. Maar ook wetenskaplikes stel groot belang in Bear Lake - een van die oudste mere in Noord-Amerika wat, in teenstelling met ander mere, selfs gedurende uitgestrekte warm en droë klimaatperiodes nooit uitgedroog het nie. Die plaaslike bankbedryf was interessant genoeg om die belangstelling van die berugte bankrower Butch Cassidy (1866–1908) en sy Wild Bunch te wek. So is The Bank of Montpelier in Bear Lake County in 1896, vyf jaar ná sy stigting, deur Cassidy beroof.