Darryl Earl David
Darryl Earl David is die eerste Indiër wat ’n lektor in Afrikaans aan ’n universiteit geword het toe hy in dié amp aangestel word aan die Universiteit van KwaZulu-Natal. Hy organiseer verskeie kunstefeeste, waaronder die Boekbedonnerd-fees op Richmond in die Noord-Kaap.
Lewe en werk wysig
Darryl Earl David is oorspronklik van Howick in Natal. In 1992 verwerf hy sy M.A.-graad in Afrikaans en later behaal hy ook ’n doktorsgraad in letterkundige toerisme. Hy is die eerste Indiër in Suid-Afrika wat lektor word in Afrikaans wanneer hy in hierdie posisie aangestel word by die Universiteit van KwaZulu-Natal. Hierdie departement is egter later deur die universiteit gesluit. Hy is veral bekend vir die stigting van Richmond in die Noord-Kaap as Boekedorp en organiseerder van die Boekbedonnerd-fees op hierdie dorp. Verskeie ander boekefeeste is ook aan sy inisiatief te danke, soos die Schreiner-fees op Cradock, die Midlands Literary Festival in Howick, die J.M. Coetzee-fees op Richmond, die Breyten Breytenbach-boekefees op Montagu en die enigste Kinderboekfees in Afrika in Pietermaritzburg. Hy neem ook die reëling van die Fugard-fees oor. In 2012 inisieer hy die oprigting van die Zoeloe letterkundige museum in Pietermaritzburg, die eerste letterkundige museum vir ’n swart inheemse taal en naas die museums vir Engels en Afrikaans die enigste in die land. Hy is getroud met Sheritha en hulle het ’n dogter, Kiara.
Skryfwerk wysig
Hy skryf “Platteland pilgrimage”, ’n boek wat ten doel het om toerisme na die argitektoniese erfenis van ons kerke op die klein dorpies in die platteland te bevorder. Hierdie boek volg op “101 country churches of South Africa”, wat hy saam met Philip Menache geskryf het. Sy kortverhaal “The slow gardener” is in 2008 in die KZN Ware Verhaalkompetisie en hierdie verhaal word later in ’n versamelbundel opgeneem.
Publikasies wysig
| Jaar | Publikasies |
|---|---|
| 2012 | 101 country churches (saam met Phillip Menache) |
| 2013 | Platteland Pilgrimage |
Bronnelys wysig
Tydskrifte en koerante wysig
- Lategan, Herman “Ek is die Raka van Afrikaans” “Rapport” 1 November 2015
- Lategan, Herman “Boekbedonnerd ’n fees soos min” “Beeld” 6 November 2015
Internet wysig
- Esat: http://esat.sun.ac.za/index.php/Darryl_Earl_David
- Lategan, Herman Netwerk24: http://www.netwerk24.com/Stemme/Aktueel/Ek-is-die-Raka-van-Afrikaans-20151030 Geargiveer 29 November 2017 op Wayback Machine
- LitNet: http://www.litnet.co.za/author/darryl-david/
- University of KwaZulu-Natal: http://www.ukzn.ac.za/news/2012/11/20/another-book-on-the-shelves-for-ukzn-author