Dawie Kriel
David Meiring Kriel (5 November 1930 – 12 Maart 2019) was 'n klassikus aan die Universiteit van Suid-Afrika (UNISA) en die Universiteit van Pretoria.[1]
Hy is in Pretoria gebore en het in 1947 aan die Helpmekaar Hoër Seunskool in Johannesburg gematrikuleer. In 1950 het hy sy BA-graad aan die Universiteit van Pretoria voltooi, gevolg deur 'n Hoëronderwysdiploma in 1952. Hy word in 1953 aangestel as Latynonderwyser te Benoni High School, en dien van 1955 tot '56 in dieselde hoedanigheid te Hoërskool Florida.[1]
Van 1957 tot 1965 was hy lektor aan die Universiteit van Pretoria, waar hy ook sy MA-graad in 1961 voltooi, en van 1963 tot 1964 ook navorsing doen aan die Universiteit van Urbino in Italië, wat sou bydra tot die afhandeling van sy D.Litt.-graad in Latyn in 1969. Na die verkryging van sy MA-graad is hy ook aangestel as senior-lektor in Klassieke Tale by die Universiteit van Suid-Afrika (UNISA), waar Gerrit Viljoen hoof van die departement was.[1]
Van 1966 tot 1983 is hy dosent in die Departement van Latyn by die Universiteit van Pretoria, aanvanklik as senior-lektor en dan as professor en departementshoof. Sy besonder geslaagde Latyn vir die Regstudent is in 1977 deur Lex Patria uitgegee. In Oktober 1983 is hy aangestel as Suid-Afrika se Kulturele Attaché by die Suid-Afrikaanse Ambassade in Rome.[1]
Hy was getroud met Zella en is oorleef deur vier dogters, Annabie, Mala, Tertia en Suzelle.[1]