Durban Light Infantry

Die Durban Light Infantry is 'n reserwemagregiment in die Suid-Afrikaanse Infanteriekorps van die Suid-Afrikaanse Leër, met hoofkwartier in Durban. Dit bestaan (met onderbrekings) sedert 1854 en het 'n geskiedenis wat aktiewe deelname aan verskeie koloniale veldslae, die Tweede Vryheidsoorlog, die Eerste Wêreldoorlog, die Tweede Wêreldoorlog, die Grensoorlog, en die Noodtoestand insluit. Die regiment het verskeie gevegsonderskeidings verwerf, en oor die jare is baie lede met dekorasies vereer. Sy leuse is Primus in Africa ('Eerste in Afrika').

Durban Light Infantry
Gestig	Mei 1854
Land	Suid-Afrika  Suid-Afrika
Weermagdeel	Suid-Afrikaanse Leër
Onderdeel van	Suid-Afrikaanse Infanteriekorps
Tipe	Infanterie
Spesialisasie	Motorisierte Infanterie
Hoofkwartier	Durban
Aantal lede	Een bataljon

Geskiedenis (Chronologie)

1850's

• 'n Vrywilligermag word in 1854 in Natal op die been gebring - onder die eenhede is die 'Durban Volunteer Guard', wat slegs twee jaar bestaan.
• Die 'Royal Durban Rangers' word in 1855 gestig.

1860's

• Die 'Durban Rifle Guard' word in 1861 gestig.
• As gevolg van ekonomiese depressie word verskeie eenhede, insluitend die Royal Durban Rangers en die Durban Rifle Guard, in 1869 ontbind.

1870's

• Die vrywilligermag herleef - onder die nuwe eenhede is die 'Royal Durban Rifles' wat in 1873 gestig en as opvolger van die vorige RDR en DRG beskou word.
• Anglo-Zoeloeoorlog (1879) - aktiewe diens in Zoeloeland.

1880's

• Die Royal Durban Rifles smelt in 1889 met die Maritzburg Rifles saam om die 'Natal Royal Rifles' te vorm.

1890's

• In 1893 word die Durbanse deel van die NRR weer 'n aparte eenheid onder die naam 'Durban Light Infantry'.
• Tweede Vryheidsoorlog (1899-1902) - verdediging van Ladysmith, aktiewe diens in Natal.

1900's

• Bhambatha-opstand (1906) - aktiewe diens in Natal.

1910's

• Ingelyf by die burgermag van die nuwe Unie Verdedigingsmagte in 1913 as die '1ste Infanterie (Durban Light Infantry)' - diensplig bly vrywillig.
• Suidwes-Afrika-veldtog (1914-15) - aktiewe diens in Suidwes-Afrika.

1930's

• Naam verander na 'Durban Light Infantry' in 1932.
• Om koning George V se silwerjubileum in 1935 te vier word die regiment tot die 'Royal Durban Light Infantry' herdoop.
• Verdeel in twee bataljonne in 1936.

1940's

• Noord-Afrika-veldtog (1941-42): die slag van Bardia, die besetting van die Gazala-linie, die verdediging van El Alamein, en die klimaktiese slag van El Alamein.
• Italiaanse veldtog (1945): aktiewe diens in Italië, insluitend die slagte van Monte Cassino, Florence, die Gotiese-linie, Monte Stanco, Monte Pezza, Monte Sole, Monte Caprara, en die deurbraak na die Po-vallei.

1950's

• Die vrywillige diensstelsel eindig in 1952 - vanaf 1952 tot 1967 is burgers vir diensplig geloot.
• Die regiment word in 1954 tot 'n enkele bataljon afgeskaal.
• Die regiment vier sy eeufees in 1954.

1960's

• Met republiekwording in 1961 verander die regiment sy naam terug na 'Durban Light Infantry'.
• Vanaf 1968 tot 1993 is burgermagdiens verpligtend ('nasionale diensplig').

1970's

• Grensoorlog - verskeie operasionele diensbeurte in noordelike Suidwes-Afrika en suidelike Angola.

1980's

• Noodtoestand (1985-90) - verskeie keer vir binnelandse veiligheidsdienste opgeroep.

1990's

• Sedert 1994 is militêre diens weer vrywillig.
• Toe die burgermag na 1994 in die reserwemag omskep is word die DLI 'n reserwemageenheid.

Gevegsonderskeidings

• South Africa 1879
• South Africa 1899-1902; Relief of Ladysmith
• Natal 1906
• South West Africa 1914-15
• Western Desert 1941-43; Bardia; Gazala; Alamein Defence; Alamein Box; El Alamein
• Italy 1944-45; Casino II; Florence; Gothic Line; Monte Stanco; Monte Pezza; Sole/Caprara; Po Valley

Verwysings

• Martin, A.C. (1969). The Durban Light Infantry.