Gouina-waterval
Die Gouina-waterval is 'n informele naam vir die "Chutes de Gouina" (Frans) in die Sénégalrivier in Mali. Hierdie watervalle word deur die diaspora-gemeenskap die Diamo-waterval genoem as gevolg van die nabygeleë Maliese dorpie Diamo. Dit is ook al die Niagara-waterval van Mali genoem.
Ligging wysig
Die Gouina-waterval is ongeveer 70 km noordoos van die myndorpie Sadiola in die verre-westelike gedeelte van Mali. Dit word gevind in die Senegalrivier, tientalle km stroomop van die voormalige Maliese hoofstad Kayes. Die waterval lê tussen die twee dorpies Bafoulabé (stroomop) en Diamou (stroomaf).
Beskrywing wysig
Die Gouina-waterval is 'n indrukwekkende waterval, ongeveer 500 m wyd (afhangende van die seisoen), en ongeveer 16 meter hoog. Die volume water wat tydens die droë seisoen oor die watervalle loop is ongeveer 12-13m3 per sekonde, en in die nat seisoen tot soveel as 2 430 m3 per sekonde. Aan die bokant van die waterval word groot maalgate gevind (sommige 2 m x 2 m wyd, en tot 2 m diep). Hierdie maalgate kan slegs in die droë seisoen gesien word, wanneer die watervlakke laag is. In die nat seisoen (Mei tot Julie) is hierdie gedeeltes onder water.
Toegang wysig
Toegang tot hierdie waterval is slegs moontlik met 'n viertrekvoertuig as gevolg van die swak tot feitlik nie-bestaande paaie. Dit neem ongeveer 2 uur om die sowat 70 km vanaf Sadiola-myndorp af te lê, ten spyte van 'n groot gedeelte van die pad wat deur “SEMOS” onderhou word. Tydens die nat seisoen is hierdie waterval bykans onbereikbaar, as gevolg van die toestand van die pad, en die talle seisoenale strome wat deurkruis moet word.
Natuurlewe wysig
Ten spyte van die afgeleë aard van hierdie omgewing, is daar bitter min natuurlewe oor. Diere wat egter wel nog aangetref word, is seekoeie, bobbejane, luiperds en vlakvarke. Tiervis word in die riviere aangetref, maar is relatief skaars as gevolg van oorbenutting.
