Graafskappe van Engeland
Die Graafskappe van Engeland (Engels: Counties of England) dien as administratiewe, geografiese en politieke afdelings. Engeland is - met uitsondering van Groter Londen en die Scilly-eilande - vir administratiewe doeleindes in 83 graafskappe (counties) verdeel. Hierdie graafskappe bestaan uit 'n enkele of meerdere distrikte.
Tans is 27 van die graafskappe in distrikte verdeel wat deur 'n sogenaamde graafskapsraad (county council) bestuur word. Ses graafskappe, wat die grootste agglomerasies dek, staan as metropolitaanse graafskappe bekend wat nie onder die beheer van 'n graafskapsraad val nie, alhoewel sommige funksies deur die distrikte (of metropolitaanse stadsgebiede, die boroughs) as laer administratiewe vlakke op 'n gemeenskaplike basis vir die hele graafskap waargeneem word.
Die hele Engeland, insluitende Groter Londen en die Scilly-eilande, is daarnaas in 48 seremoniële graafskappe (dikwels ook geografiese graafskappe genoem) verdeel waaraan 'n Lord Lieutenant as persoonlike verteenwoordiger van die Britse monarg toegewys is. Die meeste van hierdie seremoniële graafskappe kom ooreen met die gelyknamige metropolitaanse of nie-metropolitaanse graafskappe, alhoewel hul grense dikwels nouer getrek is. Die presiese grense is deur die Lieutenancies Act van 1997 bepaal. Die bevoegdhede, wat vroeër aan die amp van Lord Lieutenant verbonde was, was wisselend van aard, maar tans is die amp niks meer as 'n erepos nie wat aan afgetrede persoonlikhede soos offisiere, adellikes of sakelui toegeken word aangesien 'n Lord Lieutenant hoegenaamd nie by administratiewe besluite betrokke is nie.
Die huidige administratiewe bedeling het geleidelik as gevolg van hervormings ontstaan. Baie van die graafskappe het hul oorspronge in die middeleeue, alhoewel groter graafskappe soos Yorkshire, Lincolnshire en Sussex baie of alle administratiewe funksies eeue gelede kwytgeraak het. Na die geografiese graafskappe, wat voor die administratiewe hervormings van 1965 en 1974 bestaan het, word as historiese graafskappe verwys. Gebiede met graafskapsrade het tussen 1889 en 1974 as administratiewe graafskappe bekend gestaan en dele van sommige geografiese graafskappe ingesluit. 'n Uitsondering was groter stedelike nedersettings wat as county boroughs hul eie stedelike graafskappe gevorm het. In die periode tussen 1974 en 1996 het die metropolitaanse en nie-metropolitaanse graafskappe, waarvan sommige eers in 1974 gevorm is, regstreeks ooreengekom met die seremoniële graafskappe.
Die graafskappe, of dit nou historiese administratiewe eenhede of die huidige seremoniële graafskappe is, dien as geografiese basis vir 'n aantal instellings soos polisie en brandweer, sportklubs en ander nie-regeringsorganisasies.
Vir possortering en -aflewering is Engeland tot 1996 in 48 postaliese graafskappe verdeel. Die Engelse posdiens Royal Mail het hierdie verdeling ten gunste van poskodes laat vaar.
|
|
1. Northumberland |
24. Northamptonshire |
| Nie getoon nie: City of London | ||
.svg)
Eksterne skakels wysig
Wikimedia Commons het meer media in die kategorie Graafskappe van Engeland.
