Henri Farman

Henri Farman (26 Mei 1874 – 18 Julie 1958) was 'n Franse vlieënier, vliegtuigontwerper en bouer, saam met sy broer Maurice Farman.

Henri Farman

Lewensloop

Advertensieplakkaat vir 'n Farman-lugskou.

Henri Farman is in Frankryk gebore as die seun van 'n ryk Engelse koerantkorrespondent. Hy is opgelei in skilderkuns aan die École des Beaux Arts, maar het gou begin belangstel in die nuwe meganiese uitvindings wat teen die einde van die 19de eeu vervaardig is. In die negentigerjare het hy 'n fietsrykampioen geword, en rondom die draai van die eeu het hy motorwedrenne ontdek. Hy het aanvanklik 'n Panhard et Levassor bestuur en later vir Renault in die Gordon Bennett-beker deelgeneem.

Toe Charles en Gabriel Voisin in 1907 aangedrewe vliegtuie begin bou en verkoop het, was Farman een van die eerste klante. Farman het die rekord opgestel vir die langste vlug tot nog toe in Europa, en in 1908 het hy die eerste internasionale Europese vlug gemaak. Nadat hy sy eie vliegtuig ontwerp het, was hy die eerste wat 'n passasier in die lug geneem het op 29 Maart 1908. In 'n vennootskap met sy twee broers Maurice en Richard Farman het hy 'n suksesvolle en innoverende vliegtuigfabriek opgebou. Hul 1914-model is baie gebruik vir artillerie-waarnemings en verkenningsvlugte tydens die Eerste Wêreldoorlog. Die Farman Aircraft Company se Goliath was die eerste langafstand-passasiersvliegtuig, wat op 8 Februarie 1919 met gereelde vlugte tussen Parys en Londen begin het.

Farman is in 1919 met die Ridder van die Erelegioen vereer. Hy het in 1937 afgetree toe die Franse regering die lugvaartbedryf genasionaliseer het. Farman is op die ouderdom van 84 oorlede en word in die Paryse begraafplaas Cimetière de Passy begrawe.

Weetenswaardig

Dubbeldekker van Henri Farman.

Op 21 Maart 1908 was Henri Farman die wêreld se eerste lugpassasier, aan boord van 'n Voisin-vliegtuig wat deur Léon Delagrange gevlieg is.

Gelok deur die sukses van H. Farman in Frankryk, het die Aero-Club des Flandres, deur Auguste de Breyne, besluit om die man te nooi om sy vliegvaardighede in Gent te demonstreer. Tussen 25 Mei en 2 Junie 1908 het Farman verskeie vlugte onderneem, waaronder een met 'n passasier en een van 1471 m op 'n hoogte van ongeveer 7 m. Gent was dus die eerste Belgiese stad waar 'n lugvaartpionier 'n suksesvolle vlug gemaak het met 'n vliegtuig. ’n Straat is na hom vernoem waar hy sy vertonings gehou het.