Hugh Masekela

Hugh Masekela
	Hugh Masekela in 2007
Agtergrondinligting
Geboortenaam	Hugh Ramopolo Masekela
Gebore	4 April 1939; Witbank, Suid-Afrika
Sterf	23 Januarie 2018 (op 78) ; Johannesburg, Suid-Afrika
Beroep(e)	Musikant, komponis, sanger
Instrumente	Trompet, beuel, kornet
Webwerf	https://www.hughmasekela.co.za/

Hugh Ramopolo Masekela (* 4 April 1939, Witbank, Suid-Afrika – 23 Januarie 2018) was 'n Suid-Afrikaanse trompet-, beuel- en kornetspeler asook 'n komponis en sanger. Masekela was bekend vir sy jazz komposisies, veral sy anti-apartheidsliedjies soos "Soweto Blues" en "Bring Him Back Home".

Vroeë lewe wysig

Masekela is gebore in KwaGuqa Township, Witbank, Suid-Afrika. Masekela het op die ouderdom van 14 trompet begin speel, op 'n trompet van Louis Armstrong wat aan hom geskenk is deur die Aartsbiskop Trevor Huddleston. Tesame met ander jong vriende het hy die Huddleston Jazz Band gestig.

Studentejare wysig

Aan die einde van 1959 het Masekela, tesame met Abdullah Ibrahim (toe nog bekend as Dollar Brand), Kippie Moeketsi, Makhaya Ntshoko, en Johnny Gertze 'n groep by die naam van die Jazz Epistles gevorm, wat die eerste Afrika-groep was om 'n langspeelplaat in Suid-Afrika op te neem. Na die Sharpeville-slagting het Masekela egter besluit om Suid-Afrika te verlaat. Met die hulp van vriende soos Huddleston, die violis Yehudi Menuhin en John Dankworth het Masekela dit reggekry om in te skryf as student by die Londense Guildhall School of Music. Na 'n besoek aan Amerika is hy egter vinnig bevriend met Harry Belafonte en het hy 'n beurs gewen om in New York aan die Manhattan School of Music te studeer.