iLife
iLife is ’n pakket van programmatuurtoepassings vir Mac OS X wat ontwikkel is deur Apple om foto’s, video’s en musiek te organiseer, redigeer en publiseer. Die pakket bevat vyf toepassings: iPhoto, iMovie, iDVD, GarageBand en iWeb.
| iLife | |
| |
| Ontwikkelaar | Apple Inc. |
|---|---|
| Aanvanklike vrystelling | 7 Januarie 2003 |
| Bedryfstelsel | OS X, iOS[1] |
| Platform | ARM & Intel (iLife v1-’09 versoenbaar met PPC)[1] |
| Grootte op skyf | 4 GG[1] |
| Lisensie | Eiendomsprogrammatuur |
| Webblad | iLife |
Die mees onlangse weergawe van die pakket is op 22 Oktober 2013 vrygestel gedurende ’n spesiale geleentheid deur Apple. Tussen iLife ’11 en die nuutste weergawe wat nou slegs d.m.v. die Mac-Toepwinkel beskikbaar is, het die fokus op ’n jaargebaseerde allesinsluitende pakket verskuif na ’n toep-vir-toep-basis. Die term iLife word ook nou gebruik om na die toeps vir OS X en iOS te verwys. Die weergawes vir die onderskeie toestelle is gratis beskikbaar saam met die registrasie van ’n nuwe Mac-rekenaar of iOS-toestel. Opgraderings na die nuwe weergawes van vroeëre weergawes in die Toepwinkel is gratis vir enige bestaande gebruiker vergeleke met vorige pre-Toepwinkel-weergawes waar ’n gebruiker die totale pakket moes koop om die opgraderings te bekom.
Oorsprong wysig
iMovie is die oudste van die toepassings wat in iLife ingesluit is. Dit is deur Apple bemark as ’n maklik gebruikbare videoredigeringstoepassing wat beginnergebruikers in staat gestel het om professionele kwaliteit films te skep. Die eerste weergawe van die programmatuur is in Oktober 1999 vrygestel en verskeep saam met die iMac DV. Op 28 April 2000 het Apple gebruikers toegelaat om iMovie gratis af te laai vanaf hul webblad.[2] iMovie het gratis gebly tot 2003 toe dit deel geword het van die eerste iLife-vrystelling wat vir $49 verkoop is. Apple het voortgegaan om die bestaande iMovie-programmatuur op te dateer en te ontwikkel tot en met die vrystelling van iLife ’08 in 2007 toe ’n nuwe weergawe, iMovie ’08, vrygestel is. iMovie ’08 is totaal herskryf as ’n nuwe toepassing en het beduidende verskille aan die gebruikerskoppelvlak aangebring.[3]
iPhoto was die tweede toepassing in iLife wat ook begin het as ’n gratis aflaai via Apple se webblad. Die eerste weergawe is bekendgestel by die Macworld-kongres en Ekspo in 2002. Dit is bemark as die “vermiste skakel” in fotografie. Buiten dat dit gebruikers in staat gestel het om foto’s in te voer, te organiseer en basiese redigering te doen, het iPhoto gebruikers ook in staat gestel om foto’s op verskillende maniere te druk, onder andere in boekformaat.[4] Daaropvolgende weergawes van iPhoto het ’n aantal eienskappe toegevoeg, insluitend outomatiese organisering volgens geleenthede,[3] gesigte (deur gebruik te maak van gesigsherkenningstegnologie) en plekke.[5] iPhoto sluit ook ’n volskermredigeringsmodus en ’n funksie genaamd “Photocasting” (’n manier om foto’s direk vanuit iPhoto met ander te deel).[6]
iDVD is vir die eerste keer op 9 Januarie 2001 bekendgestel. Dit is verskeep met die PowerMac G4, die eerste Mac-model met ’n SuperDrive wat CD’s en DVD’s kon lees. Die eerste weergawe van iDVD het ’n eenvoudige manier bekendgestel waarop pasgemaakte DVD’s met keuselyste, agtergronde, skyfievertonings en tuisfilms gemaak kon word wat op die meeste DVD-spelers gespeel kon word.[7] iDVD is nooit vrygestel as ’n aflaai nie. Dit is egter verpak in die eerste weergawe van iLife (vrygestel in 2003) en word tans ingesluit in alle nuwe verbruikers-Mac-rekenaars
Die oorblywende twee toepassings in die iLife-pakket is vir die eerste keer bekendgestel as deel van iLife ’04 en iLife ’06 onderskeidelik. Die eerste weergawe van GarageBand, wat in 2004 vrygestel is, is ontwerp as ’n maklike manier vir beginner en gevorderde musikante om musiek te skep en te wysig op hul rekenaars. iWeb is bekendgestel by die Macworld-kongres en Ekspo op 10 Januarie 2006 en is bemark as ’n manier vir Mac-gebruikers om hul eie professioneel-ontwerpte webblaaie te hê sonder om kennis van HTML of ander kode te hê.[6]
Vrystellings en geskiedenis wysig
| Weergawe | Bekendstelling | Koste | Mac OS | Binêr | iPhoto | iTunes | iMovie | iDVD | GarageBand | iWeb |
|---|---|---|---|---|---|---|---|---|---|---|
| iLife | Macworld-konges en Ekspo op 3 Januarie 2003 | $49 | 10.1 | PowerPC | 2 | 3 | 3 | 3 | – | – |
| iLife ’04 | Macworld-kongres en Ekspo op 6 Januarie 2004 | 10.2.6 | PowerPC | 4 | 4.2 | 4 | 4 | 1 | – | |
| iLife ’05 | Macworld-kongres en Ekspo op 11 Januarie 2005 | $79 | 10.3.4 | PowerPC | 5 | 4.7.1 | HD 5 | 5 | 2 | – |
| iLife ’06 | Macworld-kongres en Ekspo op 10 Januarie 2006 | $79 | 10.4.3 | Universeel | 6 | 6.0.2 | HD 6 | 6 | 3 | 1 |
| iLife ’08 | Spesiale somerbyeenkoms[8] op 7 Augustus 2007 | $79 | 10.4.9 | Universeel | 7.0 | – | 7.0 | 7.0 | 4.0 | 2.0 |
| iLife ’09 | Macworld-kongres en Ekspo op 6 Januarie 2009 (Persverklaring) | $79 | 10.5.6 | Universeel | 8.0 | – | 8.0 | 7.0.3 | 5.0 | 3.0 |
| iLife ’11 | Apple Spesiale Gebeurtenis op 20 Oktober 2010 (Persverklaring) | $49 | 10.6.3 | Intel | 9.0 | – | 9.0 | 7.1 | 6.0 | 3.0.2 |
| iLife 2013-opdatering | Apple Spesiale Gebeurtenis op 22 Oktober 2013 | Gratis/R120 | 10.9 | Intel | 9.5 | – | 10.0 | – | 10.0 | – |
Notas omtrent spesifieke vrystellings:
- iLife ’06: Dit was die laaste vrystelling waarby iTunes ingesluit was.
- iLife ’08: Hierdie vrystelling het ’n geheel geherprogrammeerde iMovie ingesluit met ’n nuwe gebruikerskoppelvlak wat sommige van die funksies van die vorige weergawes weggelaat het. In reaksie op kritiek, het Apple iMovie HD 6 vrygestel as ’n gratis aflaai vir enigeen wat hierdie weergawe van iLife gekoop het.
- iLife ’09: Met hierdie vrystelling is die gratis aflaai van iMovie HD 6 laat vaar.
- iLife ’11: Macs met PowerPC is nie verenigbaar met iLife ’11 nie.
Komponente wysig
iPhoto wysig
- Die hoofartikel vir hierdie afdeling is: iPhoto.
iPhoto is ’n toepassing wat gebruikers in staat stel om hul digitale foto’s te berg, bekyk, redigeer en deel. Gebruikers kan hul foto’s op verskeie maniere organiseer. Geleenthede groepeer foto’s wat om en by dieselfde tyd geneem is saam. Gesigte gebruik gesigsherkenning om foto’s te organiseer wat gesigte bevat. Hierdie foto’s kan deur die gebruiker geëtiketteer en gesorteer word volgens wie in die foto is. Plekke trek voordeel uit geokoderingstegnologie. Baie kameras bed metadata in hul digitale foto’s wat inligting bevat oor die ligging van waar die foto geneem is. Plekke laat gebruikers hul foto’s op ’n kaart sien. iPhoto sluit werktuie in om foto’s te knip, die rooi-oogeffek te verminder, effekte soos sepia en swart-en-wit toe te voeg en om die beligting, versadiging, kontras en swart- en witbalans van foto’s te verstel. Naas dit alles kan gebruikers hul foto’s deur Kodak laat druk, boeke skep (waarvan hardebandkopieë bestel kan word) en kalenders en groetekaartjies laat maak.
iMovie wysig
- Die hoofartikel vir hierdie afdeling is: iMovie.
iMovie is ’n digitale videoredigeerder. Die proses van filmvaslegging deur ’n digitale kamera via FireWire is geoutomatiseer met iMovie wat gebruikers toelaat om hul video’s te splits, titels en spesiale effekte toe te voeg en om dit in films te herorganiseer. Dit is ook verenigbaar met MPEG 4-kameras, AVCHD-videokameras en Apple se iSight-webkamera. Foto’s kan ook gebruik word en ’n klankbaan kan toegevoeg word deur musiek vanaf die iTunes-musiekbiblioteek te gebruik. Dit kan dan uitgevoer word na ’n verskeidenheid van bekykbare formate, insluitend die .mov-formaat wat deur Apple se QuickTime-speler gebruik word.[9]
iDVD wysig
- Die hoofartikel vir hierdie afdeling is: iDVD.
iDVD integreer met iMovie om die skryf van films op ’n DVD toe te laat. iDVD laat gebruikers hul DVD’s pasmaak met keuselyste wat gebaseer is op temas (waarvan baie die inhoud van die films gebruik) en hoofstukpunte. Dit bevat die MPEG 2-kodeerderfunksionaliteit wat nodig is om DVD-verenigbare inhoud te vervaardig. Elke nuwe weergawe het meer keuselystemas bevat. In iLife ’09 en iLife ’11 is iDVD nie opgedateer nie (behalwe vir ’n paar foutregstellings). Daar is geen ondersteuning vir die skryf van Blu-ray-skywe in die huidige weergawe van iDVD nie.[10]
GarageBand wysig
- Die hoofartikel vir hierdie afdeling is: GarageBand.
GarageBand is ’n musiek- en potgooiskeppingstoepassing wat meer as 1 000 voorafopgeneemde oudiolusse insluit vir gebruik in projekte. Die program ondersteun ook programmatuurinstrumente en invoering van werklike instrumente soos kitare en klawerborde. GarageBand 5.0 wat ingesluit is by iLife ’09 het die opsie gebied om voorafopgeneemde instrumentlesse, wat deur bekende kunstenaars gemaak is, te koop.
iWeb wysig
- Die hoofartikel vir hierdie afdeling is: iWeb.
iWeb, wat vrygestel is by die Macworkd-kongres en Ekspo op 10 Januarie 2006, bied die moontlikheid om inhoud van die ander iLife-toepassings maklik te omskep in webblaaie deur gebruik te maak van Apple-ontwerpte sjablone met ’n een-klikoplaaifunksie na Apple se MobileMe-deeldiens. iWeb het ook gebruikers toegelaat om skakels na hul eie potgooie en fotogooie op die webblad te plaas. iWeb is die nuutste toevoeging tot die iLife-pakket. Dit is in Junie 2011 gestaak en word nie meer met nuwe Macs verskeep nie.[11]
MobileMe Web-galery wysig
- Die hoofartikel vir hierdie afdeling is: MobileMe.
MobileMe Web-galery was ’n funksie wat ontwerp is vir maklike fotodeling direk vanuit die iLife-pakket. Dit het gebruikers toegelaat om gebeurtenisse of foto-albums te skep deur gebruik te maak van die Web-galery-funksie van hul MobileMe-rekening. Dit het besoekers toegang verleen tot die besigtiging van die gebruiker se foto’s.
Sien ook wysig
Verwysings wysig
- ↑ 1,0 1,1 1,2 (en) iLife Stelselvereistes
- ↑ (en) Apple bied iMovie as ’n gratis aflaai vir PowerBook en Power Mac G4-gebruikers
- ↑ 3,0 3,1 (en) Apple stel iLife ’08 bekend
- ↑ (en) Apple stel iPhoto bekend
- ↑ (en) Apple stel iLife ’09 bekend
- ↑ 6,0 6,1 (en) Apple stel iLife ’06 bekend
- ↑ (en) Apple bring die skryf van DVD’s na die lessenaar met iDVD en DVD Studio Pro
- ↑ (en) Macworld | Apple Mac Event – Regstreekse opdatering Geargiveer 17 Mei 2008 op Wayback Machine
- ↑ (en) Apple – iMovie – Redigeer en verbeter u films met nuwe funksies
- ↑ (en) Apple – iDVD – Skep DVD’s van u video’s en fotoskyfievertonings
- ↑ (en) Apple – iWeb – Skep u eie webblad op ’n Mac
| Hierdie artikel is in sy geheel of gedeeltelik vanuit die Engelse Wikipedia vertaal. |
