JP Duminy
Jean-Paul Duminy (14 April 1984 in Kaapstad) is 'n voormalige Suid-Afrikaanse krieketspeler. Duminy was 'n suksesvolle top-orde kolwer, 'n geoefende veldwerker en 'n nuttige aflosbouler. Hy het bekendheid verwerf tydens die Suid-Afrikaanse onder-19 toer na Engeland in 2003 en in die 2003-04 plaaslike seisoen, waar hy gemiddeld meer as 72 per kolfbeurt gehandhaaf het, slegs twee jaar na hy lid van die Westelike Provinsiespan geword het. Alhoewel hy minder gereeld in kitskrieket geboul het, vind hy ook sukses met die bal, en maak sy EDI-debuut in 2004 teen Sri Lanka. Hy het onder meer tydens die krieketwêreldbekertoernooie in 2011, 2015 en 2019, die Kampioenetrofeë in 2004, 2009, 2013 en 2017, asook tydens die T20I-wêreldbekertoernooie in 2007, 2009, 2010, 2012, 2014 en 2016 vir Suid-Afrika gespeel.
| JP Duminy | ||||||
|---|---|---|---|---|---|---|
| ||||||
| JP Duminy in 2009 | ||||||
| Volle naam | Jean-Paul Duminy | |||||
| Gebore | 14 April 1984 Strandfontein, Kaapstad, Suid-Afrika | |||||
| Bynaam(e) | JP, Koppe | |||||
| Lengte | 1,70 m | |||||
| Kolfstyl | Linkshandig | |||||
| Boulstyl | Regterarm wegbreek | |||||
| Rol | Kolwer, aflosbouler | |||||
| Internasionale geskiedenis | ||||||
| Nasionale span | Suid-Afrika | |||||
| Toetsdebuut (no 302) | 17 Desember 2008 v Australië | |||||
| Laaste Toets | 6 Julie 2017 v Engeland | |||||
| Toetshempno. | 67 | |||||
| EDI debuut (no 77) | 20 Augustus 2004 v Sri Lanka | |||||
| Laaste EDI | 6 Julie 2019 v Australië | |||||
| EDI hempno. | 21 | |||||
| T20I debuut (no 30) | 15 September 2007 v Bangladesj | |||||
| Laaste T20I | 24 Maart 2019 v Sri Lanka | |||||
| T20I hempno. | 21 | |||||
| Eersterangse spaninligting | ||||||
| Jaar(e) | Span | |||||
| 2003–huidig | Kaapse Kobras (spanno. 24) | |||||
| 2001–2004 | Westelike Provinsie | |||||
| 2003 | Devon | |||||
| 2009–2010 | Mumbai Indians | |||||
| 2011–2012 | Deccan Chargers | |||||
| 2013 | Sunrisers Hyderabad | |||||
| 2014–2016 | Delhi Daredevils | |||||
| 2018 | Islamabad United; Mumbai Indians | |||||
| 2019 | Winnipeg Hawks Barbados Tridents | |||||
| Loopbaanstatistiek | ||||||
| Kompetisie | Toets | EDI | T20I | 1e rang | ||
| Wedstryde | 46 | 199 | 81 | 108 | ||
| Lopies aangeteken | 2 103 | 5 117 | 1 934 | 6 774 | ||
| Kolfgemiddeld | 32.85 | 36.81 | 38.68 | 46.08 | ||
| 100s/50s | 6/8 | 4/27 | 0/11 | 20/30 | ||
| Hoogste telling | 166 | 150* | 99* | 260* | ||
| Aflewerings geboul | 2 703 | 3 513 | 463 | 5 434 | ||
| Paaltjies | 42 | 69 | 21 | 77 | ||
| Boulgemiddeld | 38.11 | 45.55 | 28.52 | 41.06 | ||
| 5 paaltjies in 'n kolfbeurt | 0 | 0 | 0 | 1 | ||
| 10 paaltjies in 'n wedstryd | 0 | n/a | n/a | 0 | ||
| Beste boulontleding | 4/47 | 4/16 | 5/18 | 5/108 | ||
| Vangskote/Stonkings | 38/– | 82/– | 35/– | 79/– | ||
| Bron: Cricinfo, 31 Desember 2019 | ||||||
Loopbaan wysig
Duminy het sy toetsbuiging teen Australië op die WACA in Perth op 17 Desember 2008 gemaak, nadat hy sy beseerde onderkaptein Ashwell Prince vervang het.[1] Met 50 nie uit nie in die tweede beurt, slaan hy die wenlopies in die wedstryd ná 'n ononderbroke honderdtal-vennootskap met AB de Villiers. Sy prestasie word geloof deur talle kritici, waaronder Peter Roebuck. In die volgende toets, wat op Gesinsdag begin het, kombineer Duminy met die stertkolwers om sy eerste toetshonderdtal van 166 aan te teken. Suid-Afrika was meer as 200 lopies agter toe hulle hul sewende paaltjie verloor het in die eerste beurt. Hiermee het hy en Dale Steyn (76) saam 180 bygevoeg en Graeme en Peter Pollock se Suid-Afrikaanse negende-paaltjierekord teen Australië oortref. Suid-Afrika het met 'n 62 lopie-voorsprong geëindig en omskep dit in 'n nege paaltjie-oorwinning. Dit verseël die reeks vir die Proteas, die eerste keer dat Suid-Afrika in Australië 'n toetsreeks wen, en Australië verloor hul eerste tuistoetsreeks in 16 jaar.
Hy neem ook sy eerste toetspaaltjie, dié van Michael Clarke, in die derde toets op die toer. Hy het een van die indrukwekkendste vangskote ooit geneem tydens die tweede Twintig20I teen Australië in Brisbane. David Hussey moker 'n bal in die lug en terwyl Duminy hardloop na die grens, lanseer hy homself in die lug, duik en neem die vangskoot met twee hande.
Duminy speel in die Indiese Premierliga in 2009 nadat die Mumbai Indians hom vir VS$ 950 000 gekoop het. Hy behaal twee vyftigtalle in die toernooi. Hy speel sedert 2014 vir die Delhi Daredevils.
Duminy het die tweede kolwer ná Adam Gilchrist geword om op 99 uitgehaal te word in 'n Wêreldbekerwedstryd. Daar was reeds 36 gevalle waar 'n speler in die negentigs in 'n Wêreldbekertoernooi kleedkamer toe gestuur is.[2]
In September 2017 het Duminy uit toetskrieket bedank, nadat hy vanaf 2008 tot 2017 in 46 toetswedstryde gespeel het.[3] In Mei 2019 het Duminy sy uittrede uit plaaslike krieket aangekondig[4] en in Julie 2019 het hy uit alle vorme van internasionale krieket getree.[5]
Verwysings wysig
- ↑ (en) Peter Roebuck (21 Desember 2008). "Steely youths score greatest win". The Sydney Morning Herald. smh.com.au. Geargiveer vanaf die oorspronklike op 6 Augustus 2017. Besoek op 28 Desember 2008.
- ↑ (en) "Suid-Afrika teen Ierland, IKR Wêreldbeker 2011". CricketArchive. Geargiveer vanaf die oorspronklike op 20 Desember 2019.
- ↑ (en) "Duminy calls time on Test career". ESPNcricinfo. Besoek op 16 September 2017.
- ↑ (en) "JP Duminy retires from domestic cricket". ESPNcricinfo. Besoek op 5 Mei 2019.
- ↑ (en) "Duminy calls it quits on Protea career, Faf remains coy on his". Forever Cricket. Geargiveer vanaf die oorspronklike op 8 Julie 2019. Besoek op 7 Julie 2019.
Eksterne skakels wysig
Wikimedia Commons het meer media in die kategorie JP Duminy.- (en) JP Duminy by CricketArchive
- (en) JP Duminy by Cricinfo
