Jallikattu (Tamil: சல்லிகட்டு, sallikaṭṭtu) is sportgeleentheid waartydens wilde bulle getem word. Jallikattu word hoofsaaklik in die Indiese deelstaat Tamil Nadu gedurende die Pongal-oesfees beoefen. Die doel van die spel is om 'n bul te vang, vir 'n sekere tyd daaraan te hang of dit onder bedwang te bring en aan 'n boom of paal te bind. Dit word deur jong mans beoefen en pryse is op die spel vir diegene wat 'n bul suksesvol kan tem.

Jallikattu word beoefen.
Bul gooi 'n deelnemer af.

Jallikattu word as een van die oudste sportsoorte wat steeds beoefen word beskou. Volgens oorlewering het jong dames die spel in antieke tye dopgehou en is suksesvolle deelnemers as bruidegom gekies.

Die pulikulam-beesras word gewoonlik vir die geleentheid gebruik. Die beeste word in groot kuddes met slegs 'n paar veldwagters aangehou en is vir alle praktiese doeleindes wild. Slegs ervare herders kan veilig tussen die diere beweeg. Gesonde en sterk kalwers word van hierdie kuddes gekies en spesiaal vir die Jallikattu grootgemaak.

In teenstelling met Spaanse bulgevegte word die diere nie gedood nie en word hulle selde beseer. Daarteenoor is beserings algemeen onder deelnemers en is ongevalle nie ongewoon nie. Deelnemers moet die bulle met hul kaal hande en sonder enige wapens aandurf. Die beeste se horings word soms skerpgemaak, wat die spel omstrede en uiters gevaarlik maak.[1]

Van die moderne gebruike sluit in om die bulle voor deelname deur 'n veearts te laat ondersoek en om hulle met GPS-toestelle te merk sodat hulle per selfoon opgespoor en gevolg kan word.

Verwysings wysig

  1. Indiese bulfees eis vier lewens[dooie skakel], Die Burger, 17 April 1990

Eksterne skakels wysig