Jan H. du Preez
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Jan H.du Preez (1913–?) was ’n skrywer van Afrikaanse romans oor boswerkers.
Lewe en werk wysig
Jan Hendrik du Preez is op 6 Junie 1913 op Kwaaibrand in die distrik Humansdorp in die Kaapprovinsie gebore.[1] Hy is die tweede jongste in ’n familie van tien. Sy vader was in vroeër jare ’n transportryer, waarna hy as boswerker hom in die Knysna-wêreld vestig. Hy gaan skool in die plaasskooltjie, die enigste skool wat hy ooit besoek. Namiddae help hy met toulei, bylkap in die bos en skoffel. Noodgedwonge verlaat hy die skool na standerd ses en werk as boswerker en bosaanplanting onder staatsbeheer. Hierdie ervarings is die agtergrond van sy latere prosawerke. In 1934 vestig hy hom in Johannesburg, waar hy deur private studie matrikuleer en ook ’n kursus in die joernalistiek deurloop. Hy trou in 1939 met Gertruida M. Koch van Johannesburg.
Skryfwerk wysig
Sy eerste kortverhaal, “Die inkeer van ’n loënaar”, word in 1938 gepubliseer. Hierna deurloop hy nog ’n kursus in die joernalistiek en publiseer kortverhale voordat hy sy eerste roman aanpak. Sy tyd as boswerker is die agtergrond vir “Onder eenvoudige mense” en “Die dag van môre”, waarin persoonlike en liefdesprobleme en verhoudings beskryf word teen die agtergrond van die Knysna-gebied. In hierdie verhale beeld hy arbeidsvreugde en die blymoedige aanvaarding van armoede uit, in die vaste geloof dat voorspoed wag. Die tradisie dat die seun sy vader in sy beroep opvolg speel ook ’n sterk rol in hierdie verhale.
Publikasies wysig
| Jaar | Publikasies |
|---|---|
| 1941 | Onder eenvoudige mense |
| 1944 | Deur diepe waters |
| Chrissie Marico | |
| 1945 | Die dag van môre |
| 1948 | Haar eerste liefde |
Bronnelys wysig
Boeke wysig
- Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
- Kannemeyer, J.C. “Geskiedenis van die Afrikaanse literatuur 2” Academica, Pretoria, Kaapstad en Johannesburg Eerste uitgawe Eerste druk 1983
- Nienaber, P.J,; Senekal, J.H en Bothma, T.C. “Mylpale in die geskiedenis van die Afrikaanse letterkunde”
- Afrikaanse Pers-Boekhandel Tweede hersiene uitgawe 1963
- Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
- Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998
Internet wysig
Verwysings wysig
- ↑ Lewensbesonderhede is verkry van die Nasionale Afrikaanse Letterkundige Museum en Navorsingsentrum (NALN) uit ’n knipsel gedateer 26 November 1949 uit ’n onbekende publikasie en van ’n anonieme skrywer.