Jo Roos
Jo Roos (13 Mei 1926 - 21 Desember 2010) was 'n Suid-Afrikaanse beeldhouer en skilder. Hy is veral bekend vir die borsbeelde wat hy van voormalige staatshoofde, onder meer presidente Nelson Mandela en Sam Nujoma gemaak het.[1]
| Jo Roos | |
|---|---|
| Gebore | 13 Mei 1926 Unie van Suid-Afrika |
| Sterf | 21 Desember 2010 (op 84) Suid-Afrika |
| Nasionaliteit |  Suid-Afrika |
| Veld | Beeldhouwerk en skilderkuns |
Een van sy meesterstukke is die bronspaneel met tonele uit die Eerste Wêreldoorlog wat in die S.A. Oorlogsmuseum in Delvillebos in Frankryk pryk. Hy het ook uitstallings in Duitsland en in die VSA gehou. Van sy beeldhou- en skilderwerk is vandag deel van permanente uitstallings in Switserland, Engeland en Ierland. In Dublin, byvoorbeeld, is daar "klei-osse" van brons en 'n renoster van vlekvrye staalstafies van hom te sien.
Roos is tydens 'n uitstalling in Oktober 2010 in die Voortrekkermonument deur die ATKV vereer as 'n internasionaal-bekende beeldhouer en skilder van formaat.[2]
Hy is op 21 Desember 2010 op die ouderdom van 84 na 'n lang siekbed oorlede.
Werke wysig
Enkele van sy kunswerke:
- Bronsbeeldpaneel in die S.A. Oorlogsmuseum in Delvillebos, Frankryk
- Die Majuba-bronspaneel
- Voortrekkermeisie in Rustenburg, wat die lig van die beskawing uitdra
- Kampkindjie by die kampkerkhof in Pietersburg
- Borsbeelde van boereleiers:
- Gerrit Maritz (voor die Geloftekerk in Pietermaritzburg)
- Sarel Celliers
- Paul Kruger (Polokwane)
- Ds. Erasmus Smit
- Louis Tregardt
- Ds. Lindley
- Groot politieke figure soos:
- Johannes Gerhardus Strijdom
- Dr. H.F. Verwoerd (volfiguur granietbeeld wat in Orania staan)
- Nelson Mandela (op 23 September 1994 deur Mandela self in Polokwane onthul)
- Sam Nujoma
- Kopbeeld van Totius by Totiushuis in Potchefstroom
- Lewensgroot bronsbeeld van Sol Plaatje op die Potchefstroom-kampus van die Noordwes-Universiteit[3][4]
Verwysings wysig
- ↑ Bekende skilder sterf Geargiveer 24 Desember 2010 op Wayback Machine, Nuus24, 21 Desember 2010.
- ↑ ATKV vereer Jo Roos as 'n Internasionaalbekende SA Beeldhouer en Skilder van formaat, besoek op 21 Desember 2010.
- ↑ Jo Roos in die ARKpark Geargiveer 10 Januarie 2010 op Wayback Machine, besoek op 21 Desember 2010.
- ↑ Jo Roos uit hospitaal vir verering vir 70 j. van kuns, Beeld, 19 Oktober 2010.