'n Kamermaat (ook kamergenoot, kam(mie) of woonstelmaat), is 'n persoon wat 'n blyplek soos 'n woonstel of kamer met een of meer persone deel.

Kamermaats besig met 'n speletjie.

Wie bly saam met kamermaats? wysig

Kamermaats is gewoonlik ongetroude jongmense, wat werknemers en studente insluit. Dit is egter nie vreemd vir middeljarige of bejaarde volwassenes of pensioentrekkers wat enkellopend, geskei of hul eggenoot aan die dood afgestaan het om kamermaats (gewoonlik van dieselfde geslag en ouderdom) te hê nie. Getroude paartjies sal gewoonlik nie langer by kamermaats deurbring nie, veral nie as hulle eers kinders het nie.

Kamermaats kom algemeen in die Westerse kultuur voor, veral in Noord-Amerika. In die Verenigde State sal die meeste jong volwassenes ten minste 'n klein gedeelte van hul lewe saam met ander kamermaats deurbring nadat hulle die ouerhuis verlaat het. Vandaar die vele romans, rolprente, opvoerings en televisieprogramme wat kamermaats by die intrige betrek. Aan die ander kant is hierdie verskynsel weer minder gewoon vir ander volke, soos in Japan, omrede enkelkamerwoonstelle volop is. Hoewel in Europa behuising duur en skaars is, is die volke gewoonlik bitter gesteld op hul privaatheid en is minder daartoe geneig om 'n kamer te deel.

By Suid-Afrikaanse universiteite se koshuise deel kamermaats van dieselfde geslag 'n kamer.

Voordele wysig

Die algemeenste rede om 'n behuising te deel is om die verblyfonkostes te deel. In baie gevalle werk dit goedkoper per persoon uit om 'n twee- of drieslaapkamerwoonstel te deel as wat 'n eenslaapkamerwoonstel vir een persoon alleen uit die sak jaag. Met ander woorde, 'n drieslaapkamerwoonstel kos wel meer as 'n eenslaapkamer, maar dit kos nie drie keer soveel nie. Deur geld saam te gooi kan 'n groep mense minder vir hul huisvesting betaal. Ander redes is om beter fasiliteite en diens te bekom as by eenslaapkamerwoonstelle, om huiswerk te verdeel en om in geselskap te verkeer. Op hierdie manier kan dit op die lange duur ook help om die behuisingstekort binne 'n land te verlig.

Nadele wysig

Die grootste probleem is om 'n geskikte kamermaat te vind wat by die ander inwoners se geaardhede sal inpas of aanvul. Anders as om op jou eie te bly, doen die aanwesigheid van 'n kamermaat inbreuk op privaatheid, wat spanning kan veroorsaak, veral as die vertrekke klein of beknop is.

Nog 'n probleem wat kop uitsteek is die regverdige verdeling van lewensonkostes. Dit moet uitgeklaar word wie vir watter uitgawe verantwoordelik is, en dit moet tussen die twee of meer kamermaats verdeel word. Ook moet die kamermaat betroubaar en eerlik wees en hul geld betyds betaal. Om tussen 'n klomp mense te bly kan ook die slaappatrone versteur.