Keeromstraat

Keeromstraat is ‘n kort, maar bekende doodloopstraat in die hart van Kaapstad.

Die straat begin by die oostelike punt van Dorpstraat en loop suidweswaarts dood teen die agtertuin van die Sentrum vir die Boek. Voorheen het die straat ‘n noordelike ingang gehad vanaf Waalstraat deur ‘n groot poort onderdeur die gebou van die Wes-Kaapse Wetgewer.

In die straat is die Kaapse Hooggeregshoof gevestig sowel as kantore van regspersoneel. Voorheen het o.a. die Kaaplandse Nasionale Party hul kantore en D.C. Boonzaier sy ateljee daar gehad en was die Nederlandse klub daar ‘n gewilde bymekaarkomplek vir vooraanstaande Afrikaners.

Sedert sy stigting was Die Burger se kantore by Keeromstraat 30 totdat Naspers / Media 24 ‘n toringgebou aan die Heerengracht betrek het. Weens die koerant en die politieke party se kantore in die straat het die straat ‘n simbool geword van die politieke mag van die Nasionale Party. Daarom is daar dikwels in die verlede na die Keeromstraat-kliek verwys bedoelende die Nasionale Pers en die Kaaplandse Nasionale Party.

Bbibliografie

• Scannell, J.P.: Keeromstraat 30. Gedenkbundel vir die vyftigste verjaardag van Die Burger. Kaapstad: Nasionale Boekhandel, 1965.