Kleinstreepswael

voëlspesie

Die Kleinstreepswael (Cecropis abyssinica) is 'n gedeeltelike trekvoël, 'n algemene groot swael wat maklik verwar word met die grootstreepswael, aangesien die twee baie na mekaar lyk.

Kleinstreepswael
Sangopname uit die Masai Mara-wildtuin, Kenia
Wetenskaplike klassifikasie
Domein:
Koninkryk:
Filum:
Klas:
Orde:
Familie:
Genus:
Spesie:
C. abyssinica
Binomiale naam
Cecropis abyssinica
Sinonieme
Hirundo abyssinica

Identifikasie wysig

'n Volwasse kleinstreepswael is tussen 15 en 17 cm lank met 'n donkerblou bolyf en rooibruin onder die stert. Die kroon, nek en weerskante van die kop is rooi tot rooibruin gekleur. Die onderlyf is wit met donker strepe (die strepe is meer prominent as dié van die grootstreepswael wat fyner strepe het – een van die onderskeidende kenmerke) en die bo-vlerke en ondervlerkse vliegvere is swart-bruin van kleur. Die swarterige stert het baie lang buitenste vere: dié vere is dan ook ietwat langer by die mannetjies as by die wyfies. Jonger voëls se kleure is ietwat dowwer en bruiner, met minder kontras tussen die kleure en ook korter buitenste stertvere.

Habitat wysig

Kleinstreepswaels verkies beboste laevelde en word gereeld naby menslike vestings aangetref. Die voël bou 'n bakvormige moddernes met 'n buisagtige ingang aan die onderkant. Die nes het binne-in 'n sagte voering en kan in latere jare herbruik word. Neste word gewoonlik in grotte, onder rotsoorhange of aan 'n boomtak gebou. Die spesie het ook aangepas deur neste in geboue, brûe en ander mensgemaakte strukture te bou. Neste word gewoonlik op die hoogste moontlike plek gebou.

Verspreiding wysig

 
Verspreiding in Suider-Afrika

Die kleinstreepswael broei in Afrika, suid van die Sahara, vanaf Sierra Leone en die suidelike dele van Soedan tot die oostelike dele van Suid-Afrika. Die voël is 'n gedeeltelike trekvoël: kleinstreepswaels in Suid-Afrika sal noord trek in die winter. Wes-Afrikaanse voëls verlaat die noordelike gedeeltes van die broeigebiede tydens droë seisoene.

Voortplanting wysig

 
Eiers van Cecropis abyssinica

Die wyfie lê gewoonlik drie eiers. Die eiers is glanswit en sommige het soms 'n paar bruin kolletjies op. Die broeitydperk is 14-16 dae en slegs die wyfie broei op die eiers. Beide ouers sal na geboorte die kleintjies voer. Dit neem 17-19 dae voor die jong voëls vir die eerste keer probeer vlieg, waarna hulle na die nes sal terugkeer om vir 'n paar dae te rus.

Dieet wysig

Die Kleinstreepswael eet meestal vlieënde insekte, maar sal ook soms sade en klein vrugte eet.

Geluid wysig

Die voël se geluid is 'n nasale 9-10 note: tjirp-tjirp-tjirp, kriek, kriek, kriek, tjirp.

Ander name wysig

  • Engelse naam: Lesser striped swallow
  • Wetenskaplike naam: Cecropis abyssinica

Hirundo is Latyn vir "swael" en abyssinica verwys na Abissinië in Oos-Afrika (die ou naam vir Ethiopië).[1]

Verwysings wysig

  1. Clinning, C. 1989. Southern African Bird Names Explained. Johannesburg: The Southern African Ornithological Society. ISBN 0-620-14140-9

Bronnelys wysig

Sien ook wysig