Wikipedia

Louis Wain

Engelse kunstenaar (1860-1939)

Louis William Wain (5 Augustus 1860 – 4 Julie 1939) was 'n Engelse skilder wat veral bekend is vir sy skilderye van vermenslikte katte en katjies.

Louis Wain
Wain in 1903
Gebore
Louis William Wain

(1860-08-05)5 Augustus 1860
Clerkenwell, Londen, Engeland
Sterf04 Julie 1939 (op 78)
Napsbury Hospitaal, London Colney, Hertfordshire, Engeland
BeroepSkilder
EggenootEmily Richardson (trou 1884; haar dood 1887)

Wain is in Clerkenwell, Londen, gebore.[1]:9 In 1881 het hy sy eerste tekening verkoop en die volgende jaar het hy sy onderwyspos aan die West London School of Art[1]:10-14prysgegee om 'n voltydse illustreerder te word. Hy trou in 1884, maar sy vrou is drie jaar later oorlede. In 1890 het hy saam met sy moeder en vyf susters na die kusstreek van Kent verhuis, en, behalwe vir drie jaar wat hy in New York deurgebring het, het hy daar gewoon totdat die gesin in 1917 na Londen teruggekeer het. In 1914 het hy 'n ernstige kopbesering opgedoen in 'n omnibus ongeluk en tien jaar later is hy as kranksinnig gesertifiseer. Hy het die oorblywende vyftien jaar van sy lewe in psigiatriese instellings deurgebring, waar hy aanhou teken en skilder het. Sommige van sy latere abstrakte skilderye word beskou as voorlopers van die psigedeliese kuns.

Wain het honderde tekeninge en skilderye per jaar vir tydskrifte en boeke vervaardig, insluitend Louis Wain's Annual, van 1901 tot 1921. Sy werk het ook op poskaarte en advertensies verskyn, en hy het vir 'n kort tydjie keramiekwerk gedoen en geanimeerde spotprente geteken. Ten spyte van sy gewildheid en produktiewe uitset, het Wain nie ryk geword nie, moontlik omdat hy sy werk goedkoop verkoop het en kopiereg prysgegee het, en ook omdat hy sy moeder en vyf susters ondersteun het.

Wain se lewe is die onderwerp van die biografiese rolprent uit 2021, The Electrical Life of Louis Wain.

Nalatenskap wysig

Tydens 'n radio-uitsending uit 1925, om Wain te ondersteun, het die bekende skrywer H.G. Wells van Wain gesê: "Hy het die kat sy eie gemaak. Hy het 'n katstyl, 'n kat-samelewing, 'n hele katwêreld uitgevind. Engelse katte wat nie soos Louis Wain-katte lyk en leef nie, is skaam vir hulself. " Dieselfde jaar het Ramsay MacDonald geskryf: "Louis Wain was so 15 tot 20 jaar gelede op al ons mure. Waarskynlik het geen kunstenaar 'n groter aantal jongmense plesier verskaf as hy nie".[2]

 
Katte in verskillende style uit Wain se latere jare in onbekende chronologiese volgorde

Wain is beskou as 'n outoriteit op katte, en het die president en die voorsitter van die Nasionale Katklub geword en as beoordelaar tydens katskoue opgetree. Hy was ook in aanvraag as gevolg van die groeiende aantal organisasies wat hulle aan dierewelsyn toegewy het. Hy is gesien as verantwoordelik vir die verhoging van die sosiale status van katte, om hulle uit die salon te neem na 'n posisie waar selfs parlementslede hul entoesiasme vir katte met trots kon aankondig sonder vrees vir bespotting. Ten spyte van sy ongetwyfelde kundigheid, is sommige van Wain se teorieë oor die teel en aard van katte as eksentriek beskou, net soos sommige van sy idees oor filosofie en wetenskap.[2]

Aangesien Wain die laaste vyftien jaar van sy lewe in geesteshospitale deurgebring het, was daar bespiegeling oor sy geestestoestand, en is daar voorgestel dat hy aan skisofrenie gely het, met voorbeelde van sy kuns wat in verskeie sielkundehandboeke verskyn het in hoofstukke wat oor die versteuring handel.[3] In 1939 het 'n psigiater, Walter Maclay, 'n paar skilderye van Wain gevind in 'n winkel in Campden Hill en dit in 'n volgorde geplaas wat hy beweer het bewyse getoon het van 'n agteruitgang in die kunstenaar se geestelike toestand as gevolg van skisofrenie, al was die skilderye nie gedateer nie. Maclay se teorie is uitgedaag omdat Wain steeds skilderye in sy ou styl vervaardig het, sowel as meer abstrakte "kaleidoskopiese" ontwerpe, terwyl hy by Napsbury was.[1]:127-8[4][5] Ter viering van die eeufees van Wain se geboorte in The Guardian , het die katkenner Sidney Denham voorgestel dat Wain se geestelike ineenstorting veroorsaak is deur sy kopbesering, ná 'n aantal ernstige geestelike skokke.[2]

In populêre kultuur wysig

Wain se latere werk, waar sy katte geteken word by wyse van kaleidoskopies-abstrakte patrone, is geïdentifiseer as 'n belangrike voorloper tot die psigedeliese kuns van die sestigerjare van die 20ste eeu.[6]

In 1972 het die Victoria en Albert Museum 'n belangrike uistalling toegewei aan Wain se werke.[4]

Wain se lewe is die onderwerp van The Electrical Life of Louis Wain, 'n biografiese rolprent wat in 2021 deur Amazon-Studios vervaardig is, met Benedict Cumberbatch wat die rol van Wain vertolk, en met Claire Foy as sy vrou, Emily Richardson.[7]

Galery wysig

  •  
    'n Realistiese uibeelding van 'n katjie uit Wain se vroeë loopbaan
  •  
    'n Tekening deur Wain getiteld 'Caught! Keep your mouth shut and let me open your mind for you'
  •  
    'n Karikatuur uit Wain se vroeë loopbaan, hier met honde ("Pugs") in pleks van katte as model
  •  
    Wain is veral bekend vir sy skilderye en tekeninge van katjies
  •  
    Katjies in verskeie style, uit Wain se latere jare, chronologies gerangskik

Bronnelys wysig

  • All Sorts of Comical Cats. Verse deur Clifton Bingham Londen: Ernest Nister
  • Fun at the Zoo met verse deur Clifton Bingham
  • Funny Favourites. Forty-five Pen-and-Ink Drawings by Louis Wain. Londen. Ernest Nister.
  • Madame Tabby's Establishment (1886)
  • Our Farm: The Trouble of Successes Thereof (1888)
  • Dreams by French Firesides (1890)
  • Peter, A Cat O'One Tail: His Life and Adventures (1892)
  • Old Rabbit the Voodoo and Other Sorcerers (1893)
  • Fun and Frolic, met verse deur Clifton Bingham, Londen: Ernest Nister (1900).
  • The Dandy Lion (1901)
  • Cats (1902)
  • Pa Cats, Ma Cats and their kittens (1903)
  • The Louis Wain Kitten Book (1903)
  • Claws and Paws (1904)
  • Mixed Pickles deur Louis Wain (omstreeks 1905)
  • Cat's Cradle (1908)
  • Pantomime Pussies (omstreeks 1908)
  • Louis Wain's Cat Painting Book (omstreeks 1910)
  • Louis Wain's Cats and Dogs (omstreeks 1910)
  • The Louis Wain Nursery Book (omstreeks 1910)
  • Louis Wain's Cat Mascot (poskaart-inkleurboek, omstreeks 1910)
  • Father Tuck's Struwwelpeter As Seen by Louis Wain, vertel in Merry Rhymes deur Norman Gale (omstreeks 1910), tweede uitgawe Fidgety Phil and Other Tales (omstreeks 1925)
  • The Happy Family (omstreeks 1914)
  • Daddy Cat (1915)
  • Little Red Riding Hood and Other Tales (1919)
  • Music in Pussytown (omstreeks 1920)
  • Somebody's Pussies (1925)
  • The Boy who Shares My Name (1926)

Verwysings wysig

  1. ↑ 1,0 1,1 1,2 Dale, Rodney (1991) [1968]. Louis Wain: the man who drew cats. Londen: Michael O'Mara Books Limited in association with Chris Beetles Limited.
  2. ↑ 2,0 2,1 2,2 Denham, Sidney (5 Augustus 1960). "The Man who drew cats". The Guardian.
  3. ↑ "How a mental disorder opened up an invisible world of colour and pattern". Scientific American. 22 Desember 2011.
  4. ↑ 4,0 4,1 "Louis Wain's cryptic cats". Wellcome Collection. 19 Mei 2020.
  5. ↑ "Two Men and Eight Cats: Louis Wain, Walter Maclay and the Kaleidoscope Cats". Bethlem Museum of the Mind. Desember 2012.
  6. ↑ Moody, Paul (18 Oktober 2018). "The Forgotten Artist Who Changed the Way We Look at Cats". Another Man.
  7. ↑ "Louis Wain: The artist who changed how we think about cats". BBC. 28 Desember 2021.

Verdere leesstof wysig

  • Allderidge, Patricia (2000). The Cats of Louis Wain. Parys: Bibliothèque de l'Image. ISBN 2-909808-91-2.
  • Booth, Christine; Lund, Brian (2003). Louis Wain: A Picture Postcard Checklist. Reflections of a Bygone Age. ISBN 1-900138-78-6.
  • Latimer, Heather (1982). Louis Wain - King of the Cat Artists. Papyrus Publishers. ISBN 978-0-943698-00-7.
  • Latimer, Heather (2002). The English Cat Artist - Louis Wain. Papyrus Publishers. ISBN 0-943698-27-8.
  • Sauer, Walter (2008). Der Katzen-Struwwelpeter (in Duits). Neckarsteinach: Edition Tintenfaß. ISBN 978-3-937467-47-4.
  • Vincent, Adrian (1989). 100 Years of Traditional British Painting. Londen: David & Charles. ISBN 0-7153-9446-0.

Eksterne skakels wysig

Ontsluit van "https://af.wikipedia.org/w/index.php?title=Louis_Wain&oldid=2641704"