Marinus Wijnbeek
Marinus Wijnbeek (28 Augustus 1939 – 2 Augustus 2020) was 'n wetenskaponderwyser en - lektor, hoof en stigter van die destydse Kempton Park Tegniese Kollege, hoof en stigter van die destydse Technikon Noord-Transvaal, joernalis van die SAUK en televisie-aanbieder.[1] Gedurende die begin van televisie in Suid-Afrika het hy die gewilde Afrikaanse wetenskapprogram “Die Brandkluis” vir kinders aangebied. Die program is in 1979 uitgesaai.
Wijnbeek is in Den Haag, Nederland gebore en het in 1949 saam met sy ouers na Suid-Afrika geïmmigreer. Sy ouers het Afrikaans hul huistaal gemaak en die kinders ook in Afrikaans opgevoed. Hy het 'n BSc-graad met chemie en fisika as hoofvakke aan die Potchefstroomse Universiteit verwerf. Later sou 'n BA-graad met geskiedenis en staatsleer as hoofvakke volg, asook 'n honneurs in staatsleer aan die Randse Afrikaanse Universiteit.
Hy was vir nege jaar betrokke in die onderwys en het daarna by die SAUK se nuusdiens gewerk as wetenskapredakteur. In September 1996 het hy saam met sy vrou Annatjie na Nederland geïmmigreer,[2] waar hy tot met sy afsterwe gewoon het.