Point Reyes

Point Reyes is 'n kaap en gewilde toeristebestemming aan die Stille Oseaankus van Noord-Kalifornië, geleë in die distrik Marin County en sowat 30 myl (50 km) wes-noordwes van San Francisco. Die kaap het sy naam ook aan die Point Reyes-skiereiland verleen wat van Tomales Bay in die noordooste tot die Bolinas-strandmeer in die suidooste strek. Die kaap en sy natuurlewe word beskerm as deel van die natuurbewaringsgebied Point Reyes National Seashore.

Point Reyes
Natuurbewaringsgebied
Uitsig oor die natuurbewaringsgebied Point Reyes National Seashore
Ligging van Point Reyes in Kalifornië
Koördinate: 38°04′30″N 122°52′11″W
Land	Verenigde State
Deelstaat	Kalifornië
Streek	San Francisco Bay Area
Distrik	Marin County
Stigting van natuurbewaringsgebied	13 September 1962
Oppervlak
• Totaal	287,6 km2 (111,0 vk. myl)
Tydsone	UTC-8 (PST)
• Somertyd	UTC-7 (PDT)

Geologie

'n Kaart van die San Andreas-breuk wat die teenoorgestelde bewegings van die Pasifiese en Noord-Amerikaanse Plaat aandui. Point Reyes, wat maklik op die kaart uitgeken kan word, beweeg saam met die Pasifiese Plaat jaarliks sowat vyf sentimeter in noordwestelike rigting

Die hele Point Reyes-skiereiland is, in teenstelling met die res van Marin County as deel van die Noord-Amerikaanse Plaat, teen die oostelike rand van die Pasifiese Plaat geleë. Dit maak deel uit van die sogenaamde Salinian Block, 'n geologiese terrein (Engels: terrane) of fragmentariese blok van die aardkors wat na die Salinas Valley genoem is en deur die magtige Kaliforniese San Andreas-breuk oor 'n tydperk van miljoene jare sowat 500 km noordwaarts verskuif is.

Dié breuk, wat regstreeks onder Tomales Bay loop, vorm ook die skiereiland se oostelike grens. Point Reyes se oorspronklike oostelike teenstuk as landskapsvorm is die Tehachapi Mountains, 'n bergreeks wat 500 km verder suidwaarts in die distrikte Kern County en Los Angeles County geleë is.