Pols-oksimeter
'n Pols-oksimeter is 'n mediese apparaat wat die hoeveelheid suurstof in 'n mens se bloed indirek meet. Dit word dikwels aangeheg aan 'n mediese monitor sodat mediese personeel die pasiënt se bloedoksigenasie ten alle tye kan lees.
Die mees algemene tipe monitor meet die hoeveelheid versadiging van die bloed se hemoglobien. Dit het gewoonlik 'n paar klein liguitstralende diodes (Engels: light emitting diode -- LED) geplaas teenoor 'n fotodiode op 'n sensor, wat aan 'n liggaamsdeel wat ligdeurskynend is, geknip word (meestal 'n vingerpunt of oorlobbetjie). Die een LED is rooi, met 'n golflengte van 660 nm, en die ander is infrarooi, met 'n golflengte van 910 nm. Die absorpsie van ligstrale op elkeen van die twee golflengtes verskil betekenisvol vir beide oksihemoglobien en die gedeoksigeneerde vorm daarvan, en met behulp van die verskil tussen die absorpsie van die rooi en infrarooi lig kan die oksi/deoksihemoglobienverhouding dus bepaal word. Omdat die hoeveelheid bloed in die kapillêre sisteem van die bloeddruk afhang, wat op sy beurt verskil op grond van die hartklopsiklus, kan die polstempo ook daarmee gemeet word.
Tipies meet 'n bloedsuurstofmeter in persentasie van normaal, met aanvaarbare reikwydte tussen 95 en 100 persent.
Hierdie monitors is van kritiese belang in noodmedisyne, vir pasiënte met asemhalings- of hartprobleme, en ook vir vlieëniers wat werk in kajuite sonder lugdrukbeheer bokant 10 000 voet, aangesien hulle aanvullende suurstof benodig.
Die nuutste generasie pols-oksimeters gebruik gevorderde digitale seinprosessering om akkurate meting te voorsien selfs in gevalle van probleme soos pasiëntbeweging, lae perfusie, helder agtergrondslig en elektriese stoornisse. Die nuutste modelle (2005 en later) kan selfs ook koolstofmonoksiedvlakke monitor.
Sien ook wysig
Eksterne skakels wysig
- (en) Hoe 'n Pols-oksimeter werk Geargiveer 24 Mei 2006 op Wayback Machine
| Hierdie artikel is in sy geheel of gedeeltelik vanuit die Engelse Wikipedia vertaal. |
