Queen Elizabeth Hotel
Fairmont The Queen Elizabeth
Fairmont Le Reine Élizabeth
Fairmont Hotels and Resorts
Montreal, Quebec.svg){kind=small}
Kanada
Geopen op
Kamers
1039
Suites
100
Geriewe
Vier restourante
Webtuiste
Queen Elizabeth
Die Queen Elizabeth Hotel (Frans: Le Reine Élizabeth, amptelike Franse naam: Fairmont Le Reine Élizabeth; amptelike Engelse naam: Fairmont The Queen Elizabeth) is 'n luukse hotel in Montreal, Quebec, Kanada. Die hotel is in 900 Boulevard René Lévesque Ouest in die middestad van Montreal geleë en het 'n regstreekse toegang tot die hoofstasie en die Ondergrondse Montreal.
Die hotel is deur die spoorwegmaatskappy Canadian National Railway (CN) gebou en in 1958 voltooi, maar later aan Canadian Pacific Hotels (tans Fairmont Hotels and Resorts) verkoop. Dit is die grootste hotel in die provinsie Quebec met 21 verdiepings en 1039 kamers, asook die hotelketting Fairmont se tweede grootste hotel in Kanada ná die Royal York in Toronto met 1365 kamers.
Geskiedenis wysig
Die hotel se naam was aanvanklik omstrede. Franssprekende nasionaliste wou dit ter ere van Montreal se stigter, Paul Chomedey de Maisonneuve, Château Maisonneuve noem. Die voorsitter van CN, Donald Gordon, het egter daarop aangedring dat dit na die koningin vernoem moes word wat in 1952, toe die hotel nog in ontwerpfase was, onverwags die troon bestyg het. Die manlike lidwoord le in die Franse naam is ongewoon, maar dit het betrekking tot die hotel (die woord hôtel behoort in Frans tot die manlike geslag) en nie die koningin nie.
Die Queen Elizabeth het van die begin af as 'n hotel bekend gestaan wat aan die hoogste eise van kieskeurige gaste kan voldoen. Dit het staatshoofde, internasionale sakeleiers en kunstenaars van wêreldfaam gehuisves, waaronder koningin Elizabeth II (vier keer) en Prins Philip, Hertog van Edinburg, die koningin-moeder, Charles III, Fidel Castro (die eerste staatshoof wat die hotel besoek het), generaal Charles de Gaulle, prinses Gracia Patricia van Monaco, die vroeëre eerste minister van Indië, Indira Gandhi, Zhao Ziyang, Felipe van Spanje, Jacques Chirac, Nelson Mandela, die Dalai Lama, Michail Gorbatsjof, Jimmy Carter, Henry Kissinger, Perry Como, Joan Crawford, John Travolta, Michail Barisjnikof, Harry Belafonte, Louis Malle en George W. Bush.
Die hotel het wêreldwyd opslae gemaak toe John Lennon en Yoko Ono, wat toegang tot die Verenigde State geweier is, in kamer 1742 tussen 26 Mei en 2 Junie 1969 hul sogenaamde Bed-in gehou het. Op 1 Junie het André Perry in dié kamer John Lennon se eerste solo-enkelsnit, Give Peace a Chance, opgeneem wat in die 1970's die himne van die Amerikaanse anti-oorlogsbeweging sou word.
Gedurende die politieke Oktoberkrisis van 1970 het die provinsiale regering van Quebec sy operatiewe hoofkwartier na die hotel verskuif. Die Queen Elizabeth het gedurende die wêreldtentoonstelling Expo '67 vyftig van die sestig besoekende staatshoofde in luukse suites gehuisves en is as hoofkwartier vir die Olimpiese Somerspele 1976 gekies.
Die totale getal besoekers sedert die opening in 1958 beloop meer as 22 miljoen. Tussen 2016 en 2017 is die hotel omvattend gerestoureer.