Sasha Son
Sasha Son – kunstenaarsnaam van (Russies) Dmitry Shavrov, (Litaus) Dmitrijus Šavrovas, kort Dima Šavrovas, buite Oos-Europa ook bekend as Sasha Song,[1] * 18 September 1983 in Vilnius, Litause SSR – is 'n Litause sanger van Russies-Litause afkoms. Sy kunstenaarsnaam is 'n kombinasie van die Russiese roepnaam vir Aleksander ("Sasha") en die Russiese woord son ("droom").
Sasha Son | |
|---|---|
 Sasha Son in 2009 | |
| Agtergrondinligting | |
| Geboortenaam | Litaus: Dmitrijus Šavrovas, Russies: Dmitry Shavrov |
| Gebore | 18 September 1983 Vilnius (Litaue) |
| Genres | Pop |
| Beroep(e) | Sanger, liedjieskrywer |
| Instrumente | Stem, klavier |
| Jare aktief | 1993 — hede |
| Etikette | Monaco / Silence Agency |
Terwyl hy in sy tuisland reeds een van die bekendste musikale kunstenaars is wat groot invloed op die Litause popmusiek uitoefen, het hy in die buiteland veral danksy sy optredes tydens internasionale musiekfeeste en die Eurovision-sangfees van 2009 in Moskou bekendheid verwerf.
Biografie wysig
Vroeë lewe wysig
Dima Šavrovas het reeds op 12-jarige ouderdom 'n groot treffer met sy snit Mamai ("Vir Ma") en die album Svajonių Laivas ("Die Skip van Drome") behaal en was die jongste sanger ooit wat die Bravo-musiekprys vir die "lied van die jaar" met Mamai gewen het. Op 15-jarige ouderdom het hy na die Verenigde Koninkryk verhuis waar hy 'n sekondêre skool bygewoon en 'n musikale opleiding ontvang het.
Beroepslewe wysig
Nadat sy groep Unconventional Soul nie die verwagte sukses behaal het nie en ook geen platekontrak kon ontvang nie, het Dima Šavrovas ná agt jaar se verblyf in Bromley, Londen in die Verenigde Koninkryk na Litaue teruggekeer en saam met Hywel Sam die Groot Prys van die internasionale musiekfees Palanga 2005, wat in die kusstad Palanga gehou is, gewen. Sy eerste enkelsnit in twaalf jaar, Ne Uletaj (Russies: "Moenie wegvlieg nie"), wat hy saam met die Litause musiekgroep SEL opgeneem het, het die eerste plek in die Balties-Russiese top 10-radiotrefferlys behaal. Dit was dertien weke lank in die top 5- en veertien weke lank in die top 10-trefferlys.[2]
Onder sy nuwe kunstenaarsnaam Sasha Son het Dima Šavrovas Litaue in die internasionale Eurovision-sangfees in 2009 verteenwoordig. Sy lied Miss Kiss het in 2008 op die derde plek van die Litause finale rondte beland. In Moskou het hy 2009 in die halffinaal en die finaal meegeding waar hy die 23ste plek met sy lied Pasiklydęs žmogus (Russies Okinoky Geroi, Engels Love) behaal het. Die lied is in Moskou in Engels en Russies voorgedra. Die Litause weergawe het plek 1 op die Litause trefferlys behaal. Sasha Son tree gereeld voor sowel plaaslike Baltiese asook internasionale gehore op.
Sasha Son het saam met die sangeres Nora met sy lied Say Yes to Life vir die Litause finale rondte van die Eurovision-sangfees 2010 gekwalifiseer wat op 4 Maart 2010 gehou is en 'n vyfde plek behaal.[3] In 2017 het Sasha Son met sy liedjie Never Felt Like This Before in Litaue se nasionale Eurovision-musiekwedstryd meegeding.[4]
Musikale invloede wysig
Sasha Son beskryf sy musiekstyle op sy MySpace Music-gebruikersbladsy as soul, rhythm & blues en alternatiewe musiek en verwys onder meer na Whitney Houston, Queen-sanger Freddie Mercury, jazz-sangeres Ella Fitzgerald, Boyz II Men en Alicia Keys as sy belangrikste musikale invloede.[5]
Diskografie wysig
Langspelers wysig
- Sasha Song: Dima Šavrovas (Monaco 2010)
Verwysings wysig
- ↑ www.klubas.lt
- ↑ www.muzika.draugiem.lv: Sasha Son – Biogrāfija
- ↑ Eurovision Song Contest Oslo 2010 – News: Lithuania sends InCulto to the Eurovision Song Contest
- ↑ wiwibloggs.com: Never Felt Like This Before: Sasha Song releases music video for his Lithuania NF entry. Besoek op 10 April 2017
- ↑ MySpace Music – Sasha Son
Eksterne skakels wysig
| Wikimedia Commons bevat media in verband met Sasha Son. |
- Sasha Son
- www.muzika-draugiem.lv: Biografie (Russies, Litaus, Engels en Frans) en MP3-snitte van 34 treffers
- Sasha Son se My Space-webwerf
- Music Export Lithuania: Sasha Song
- Profiel op music.lt
- Unconventional Soul