Seën van Aäron
Die priesterlike seën van Aäron (ברכת כהנים; birkat kohanim), ook bekend as die uitstrek van die hande (Hebreeus: nesiat kapajim), of dukhanen (van die Jiddisje woord dukhan – platform – omdat die seëning van 'n verhewe rostrum uitgespreek word),[1] is 'n Hebreeuse gebed wat deur die kohanim, oftewel priesters voorgedra word. Volgens die Tora is hulle as afstammelinge van Aäron, wat die eerste hoëpriester en ouer broer van Moses was, deur God aangewys om in die tabernakel te werk, en die Israeliete by te staan in seëninge, bediening, offerhandes en versoening vir hul sondes voor God, vir alle ewigheid.
Soos in die Tora voorgeskryf,[2] is dit die gewyde taak van die kohanim om hulle hande op te hef en die mense te seën,[3] en God belowe (in Numeri 6:27) dat die volk geseën sal word wanneer die kohanim op hierdie wyse sy Naam oor hulle uitspreek. In die Joodse tradisie, het uitsprake van Joodse wysgere beklemtoon dat alhoewel dit die priesters is wat die seëning uitvoer, dit nie hulle is, of die seremoniële praktyk om hulle hande na die volk uit te strek wat die seëning meebring nie, maar sou dit eerder God se wil wees dat Sy seëning deur die hande van die kohanim oorgedra sou word.
Selfs ná die vernietiging van die Tweede Tempel in Jerusalem, is die gebruik voortgesit in Joodse sinagoges, en vandag selfs in meeste Joodse gemeenskappe, dat die kohanim die aanbidders seën in die sinagoge tydens spesiale Joodse gebedsdienste.
Die teks van die priesterlike seëning wat deur die kohanim voorgedra word, en wat in (Numeri 6:24-26 van) die Tora opgeskrywe staan, is:
- Mag die HERE julle seën en julle beskerm –
- יְבָרֶכְךָ יהוה, וְיִשְׁמְרֶךָ
- (Jewārēg-gā Adōnāi wejisjmerēgā …)
- Mag die HERE Sy aangesig oor julle laat skyn en julle genadig wees –
- יָאֵר יהוה פָּנָיו אֵלֶיךָ, וִיחֻנֶּךָּ
- ("Jāʾēr Adōnāi pānāw ēlegā wigoennékkā …)
- Mag die HERE Sy aangesig na julle ophef en julle vrede gee –
- יִשָּׂא יהוה פָּנָיו אֵלֶיךָ, וְיָשֵׂם לְךָ שָׁלוֹם
- ("Jissā Adōnāi pānāw ēlegā wijāsēm legā, sjālōm.")
Verwysings wysig
- ↑ Nulman, Macy, Encyclopedia of Jewish Prayer (1993, NJ, Jason Aronson) s.v. Birkat Kohanim, bladsy 109; Gold, Avi, Bircas Kahonim (1981, Brooklyn, Mesorah Publ 'ns) bladsye 28–29
- ↑ Numeri 6:23–27. Gevind in Parsjat Naso, die 35ste parasja in die jaarlikse siklus
- ↑ Kyk Levitikus 9:22
Eksterne skakels wysig
| Wikimedia Commons bevat media in verband met Seën van Aäron. |
- Seën van Aäron in Hebreeus, Youtube
- Birkat Kohanim, The Priestly Blessing, John J. Parsons