Seepunt (kiesafdeling)

Seepunt was 'n kiesafdeling vir die Volksraad van Suid-Afrika aan Kaapstad se Atlantiese kus.

Colin Eglin, L.V. vir Seepunt van 1974 tot 1994.

Die eerste algemene verkiesing nadat die kiesafdeling ontstaan het, was in 1929 toe Gideon Brand van Zyl onbestrede vir die Suid-Afrikaanse Party verkies is. In 1933 staan W.F. Fish as onafhanklike teen Van Zyl en verloor met 'n skamele 33 stemme, maar in 1938 vaar Van Zyl, nou 'n kandidaat van die Verenigde Party, heelwat beter teen G. Parker van die Dominiumparty en wen met 3 480 stemme.

In 'n tussenverkiesing op 11 Januarie 1943, genoodsaak deur Van Zyl se aanstelling as administrateur van Kaapprovinsie, word die V.P. se C.B.M. Abbott onbetrede verkies en so ook in die verkiesing later daardie jaar. In 1948 kom hy te staan teen K. Cunningham van die Sentrale Groep, maar wen met 'n meerderheid van 6 388 stemme. Niemand sien kans om Abbott in 1953 teen te staan nie, en vir die laaste keer word hy onbestrede verkies.

J.A.L. Basson wen Seepunt in 1958 teen die Liberale Party se G. Gordon met 'n meerderheid van 5 625. Die uitslag van die volkstemming oor republiekwording in 1960 was dus geen verrassing nie: 10 877 nee-stemme, 1 077 ja-stemme. In die eerste verkiesing waaraan die Progressiewe Party deelneem, kry I.S. Fourie in Seepunt 3 425 stemme vergeleke met Basson se 6 199. In 1966 waag Colin Eglin, voormalige V.P.-L.P. in Pinelands, wat in 1961 daar as Progressiewe Party-kandidaat teen die V.P. verloor het, die eerste keer sy hand aan Seepunt en kry 2 739 stemme vergeleke met Basson se 6 497. Hy probeer weer in 1970 en verloor met net 231 stemme teen Basson, wat nou reeds die vierde keer in Seepunt wen.

In 1974, die jaar waarin die P.P. uiteindelik 'n deurbraak maak en Helen Suzman tydens die verkiesings vyf kollegas in die Volksraad kry, wen Eglin met sy derde probeerslag in Seepunt teen die V.P. se David Graaff, seun van die partyleier, sir De Villiers Graaff, met 'n skaflike meerderheid van 839. Die belangstelling was taamlik groot met 85,3% van die kiesers wat gaan stem het. Eglin behou uiteindelik die setel in 1977, 1981, 1987 en 1989.

Partye en kandidate gewen

• 1929 - G.B. van Zyl van die Suid-Afrikaanse Party (onbestrede)
• 1933 - G.B. van Zyl van die Suid-Afrikaanse Party
• 1938 - G.B. van Zyl van die Verenigde Party
• 1943 - C.B.M. Abbott van die Verenigde Party (onbestrede)
• 1948 - C.B.M. Abbott van die Verenigde Party
• 1953 - C.B.M. Abbott van die Verenigde Party (onbestrede)
• 1958 - J.A.L. Basson van die Verenigde Party
• 1961 - J.A.L. Basson van die Verenigde Party
• 1966 - J.A.L. Basson van die Verenigde Party
• 1970 - J.A.L. Basson van die Verenigde Party
• 1974 - Colin Eglin van die Progressiewe Party
• 1977 - Colin Eglin van die Progressiewe Federale Party
• 1981 - Colin Eglin van die Progressiewe Federale Party
• 1987 - Colin Eglin van die Progressiewe Federale Party
• 1989 - Colin Eglin van die Demokratiese Party

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland, Mowbray, Nuweland, Parow, Pinelands, Rondebosch, Simonstad, Soutrivier, Suid-Skiereiland, Tygervallei, Vasco, Woodstock, Wynberg

Bronne

• Amptelike Jaarboek van die Republiek van Suid-Afrika 1983. 1983. Johannesburg: Chris van Rensburgpublikasies.
• (en) Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• (af) Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.