Slag van Nooitgedacht

Die Slag van Nooitgedacht het op 13 Desember 1900 tydens die Tweede Vryheidsoorlog plaasgevind op die plaas Nooitgedacht. Nooitgedacht is aan die suidekant van die Magaliesberg, ongeveer 30km noordwes van Krugersdorp geleë. Hier het magte van die drie Boere generaals Koos de la Rey, Christiaan Beyers en Jan Smuts 'n Britse Mag, onder beheer van generaal Clements, 'n gevoelige neerlaag toegedien. Die Boeremag was ongeveer 2500 man en die Britse mag 2000 man sterk. Die Boeremagte het oor die gebruik van vyf en die Britse Mag dié van 10 kanonne beskik.

Slag van Nooitgedacht
Deel van die Tweede Vryheidsoorlog
Datum 13 Desember 1900 Ligging Nooitgedacht, Suid-Afrika Resultaat Boerse oorwinning
Strydende partye
Verenigde Koninkryk	Zuid-Afrikaansche Republiek (Transvaal)  Oranje-Vrystaat
Bevelvoerders
R. A. P. Clements	Koos de la Rey, Christiaan Beyers, Jan Smuts
Sterkte
2 000	2 500
Ongevalle
109 gesneuweldes 186 gewond 35 gevange geneem	32 gesneuweldes 46 gewond

Voorbereiding

Op 12 Desember het generaal Beyers die Magaliesberg by Boschfontein gekruis en kragte met die ander twee generaals saamgesnoer. Die drie generaals het vanaf die kruin van die Magaliesberg die Britse kamp bespied en gesien dat daar tekortkominge in die verdedigingstelsel van die Britte was. Hul plan was dat generaal Beyers die Britse Mag op die kruin van die berg met 1000 Burgers sal aanval en dat genls. Smuts en De la Rey die Britse Magte, wat onder die berg gevestig was, met 700 Burgers elk sou aanval. Die Britse magte, op die kruin, het weerskante van 'n ravyn gekamp.

Die Slag

Om 3:30 die oggend generaal De la Rey se Burgers die eerste skote geskiet. Generaal Beyers se Burgers het om 5:00 tot die slag toegetree en om 7:00 was die Britse Magte op die kruin verslaan. Die Boere kon toe vanaf die bokant van die berg op die Britse Mag skiet. Die meeste Britse soldate het op die vlug geslaan na die fort by Vaalkop.

Ongevalle

Die Boereverliese was as volg: 32 gesneuweldes en 46 gewond terwyl daar 109 Britse soldate gesneuwel het, 186 gewond was en 35 gevange geneem was. Die Boere het ook 70 waens vol met voorraad, 200 tente, 700 perde en muile, 500 trekosse en baie ammunisie buitgemaak. Generaal Clements kon daarin slaag om te ontsnap.

Sien ook

• Skermutselinge van die Tweede Vryheidsoorlog

Bronne

• The War Reporter. J.E.H. Grobler. Jonathan Ball Publishers. 2004. ISBN 978-1-86842-186-2
• Evans, Martin Marix. The Boer War: South Africa 1899-1902. Oxford: Osprey, 1999. ISBN 1-85532-851-8
• Pakenham, Thomas. The Boer War. New York: Avon Books, 1979. ISBN 0-380-72001-9