Slaptjips
Slaptjips is diepgebraaide stafies aartappels wat ongeveer so lank soos 'n vinger is. Dit was oorspronklik 'n Belgiese spesialiteit, maar het intussen dwarsoor die wêreld 'n gewilde vullende bygereg geword wat dikwels by wegneem-eetplekke verkoop word. Slaptjips is daarnaas ook een van die belangrikste bevrore voedselprodukte.
Metode wysig
Vir die bereiding van slaptjips word geskilde aartappels in stafies met 'n deursnee van sowat een sentimeter en 'n lengte van tussen twee en tien sentimeter gesny, effens gedroog en vervolgens in plantolie twee keer diepgebraai - eers teen 'n temperatuur van tussen 140 en 180 °C totdat hulle 'n liggeel kleur kry, en daarna - sodra hulle afgekoel het - 'n tweede keer teen 'n temperatuur van sowat 190 °C diepgebraai totdat hulle 'n goue kleur verkry.
Slaptjips wat slegs eenkeer diepgebraai word, is dikwels nie gaar aan die binnekant nie of kry 'n donker kors. Indien 'n te groot hoeveelheid slaptjips op een keer gebraai word, koel die olie in die pot sterk af, en die aartappels suig baie olie op aangesien daar geen beskermende korslaag kan vorm nie. Voordat hulle bedien word, word die slaptjips gedreineer van olie en gesout.
Industriële vervaardiging wysig
Restourante en privaatverbruikers gee, ter wille van gerief, dikwels voorkeur aan industrieel-verwerkte slaptjips wat na die eerste braai gevries is. Hulle moet voor bediening net nog éénkeer diepgebraai of in die oond gebak word. Verwerkte slaptjips word soms ook van aartappelpuree of -granulaat gevorm.
Vir die industriële vervaardiging van slaptjips word veral langerige aartappels gebruik. Produsente gee voorkeur aan soorte met 'n liggeel kleur sodat die eindproduk goudbruin en nie grys is nie. Aartappelsoorte met 'n hoër konsentrasie stysel krimp nie wanneer die water verdamp nie. Geskikte soorte is bv. Agria, Granola en Ditta.[1]
Die aartappel word gewas en onder stoom in 'n aartappelskiller geskil, geblansjeer, in loopbanddroërs gedroog en in groot diepbraaiers gebak. Sodra die slaptjips gereed is, word hulle afgekoel en uiteindelik in vriestonnels bevries. Moderne aanlegte vir die vervaardiging van slaptjips kan tot 25 ton klaarproduk per uur hanteer.
Die grootste vervaardigers wêreldwyd is McCain Foods (Kanada), Simplot en Lamb Weston (albei in die VSA).
Sien ook wysig
Verwysings wysig
Eksterne skakels wysig
Wikiwoordeboek het 'n inskrywing vir slaptjips.
| Wikimedia Commons bevat media in verband met French fries. |