Spoetnik-ruimteprogram

Die Spoetnik-ruimteprogram (Russies: Спутник; "satelliet" of "medereisiger") was ’n reeks ruimtetuie van die Sowjetunie. Die eerste een, Spoetnik 1, was die eerste mensgemaakte voorwerp in ’n wentelbaan om die aarde. Dit is op 4 Oktober 1957 gelanseer en het teen 29 000 km/h om die aarde gewentel.

’n Replika van Spoetnik 1.

Spoetnik 2 is op 3 November 1957 gelanseer en het die eerste lewende passasier aan boord gehad: die wyfiehond Laika. Die sending het nie voorsiening gemaak vir die veilige terugkeer van Laika nie.

Spoetnik 3 was veranderstel om die Sowjetunie se eerste satelliet om die aarde te wees. Die lansering is egter voortdurend uitgestel en eindelik is die eenvoudige Spoetnik 1 en daarna Spoetnik 2 in die plek daarvan gelanseer uit vrees dat die VSA die Sowjetunie in die ruimte sou voorspring. Spoetnik 3 is eindelik op 15 Mei 1958 gelanseer. Dit was ’n navorsingsatelliet om die boonste atmosfeer en die nabye ruimte te verken.

Spoetnik 4 of Korabl-Spoetnik 1 was die eerste toetsvlug van die Sowjetunie se Wostok-ruimtetuig wat later vir die eerste bemande ruimtevlug gebruik sou word. Dit is op 15 Mei 1960 gelanseer. ’n Fout in die gidsstelsel het veroorsaak dat die tuig na ’n hoër wentelbaan beweeg het in plaas daarvan om terug te keer aarde toe.

Spoetnik 5 of Korabl-Spoetnik 2 was die tweede toetsvlug van die Wostok-ruimtetuig. Dit was die eerste keer dat diere die ruimte ingestuur is en veilig teruggebring is aarde toe. Dit is op 19 Augustus 1960 gelanseer met twee honde, Belka en Strelka, en ander diere aan boord. Die tuig het op 20 Augustus teruggekeer, ’n dag ná die lansering.

Spoetnik 6, Korabl-Spoetnik 3 of Wostok-1K No. 3 is op 1 Desember 1960 gelanseer. Dit het twee honde bevat, Ptsjolka en Moesjka, sowel as ’n televisiekamera en wetenskapinstrumente. Die vlug het ’n dag geduur, waarna dit op 2 Desember weens ’n tegniese fout in die atmosfeer gedisintegreer het.

Spoetnik 7 of Tjazjoli Spoetnik ("Swaar Satelliet"), ook bekend as Wenera 1WA No. 1, is op 4 Februarie 1961 gelanseer. Dit was veronderstel om die eerste ruimtevlug te wees om die planeet Venus te verken. Weens ’n tegniese fout het dit egter nooit sy lae wentelbaan verlaat nie. Dit het die aarde se atmosfeer op 26 Februarie 1961 oor Siberië binnegedring. In ’n poging om die mislukking van die ruimtesending te ontken het die Sowjet-regering aangekondig dat die tuig ’n toetsvlug was vir ’n "swaar satelliet" wat sou dien as lanseerplatform vir toekomstige sendings.

Die meeste van dié ruimtetuie, asook latere Spoetnik-tuie, was ook onder ander name bekend.

Eksterne skakels wysig