’n Stoppelbaard is die ongeskeerde gesigshare van ’n man, wat nog nie lank genoeg is om die vel te bedek en as volgroeid gereken kan word nie. Die stoppelbaard-benaming word hoofsaaklik gebruik om na gelaatshare te verwys wat te kort is om as ’n volkweekte baard of snor bestempel te word. Elektriese skeermesse word ingespan om ’n stoppelbaard te help skep en die vorm daarvan te behou. Stoppelbaarde was veral ’n modegier onder die Duitsers teen die aanvang van die 16de eeu, toe baie jong mans ’n week lank stoppelbaarde gekweek het, voordat hul geskilder is.

’n Man met ’n stoppelbaard.

Die Engelse woord, five o’clock shadow, verwys gewoonlik na ’n baard van ’n man wie se gesig die oggend skoongeskeer is, wat laatmiddag begin sigbaar word. Die benaming is afgelei van die tipiese (Amerikaanse) werksdag wat teen 5-uur namiddag eindig.

Gedurende die 1980’s het tweedae-stoppelbaarde vir ’n ruk lank as modegril gedien, wat grootliks deur die televisiereeks ,,Miami Vice” met die ongeskeerde hoofrolspeler James “Sonny” Crocket (Don Johnson) aangeblaas is. Dit het ook as die ontwerperstoppelbaard bekend gestaan, veral indien dit soos ’n gewone baard gevorm en versorg is. Later is die elektriese skeermes, ene die Miami Device, op die mark bekend gestel, wat stoppelbaarde só kon skeer dat dit ’n eendag-, tweedag- of heelwatdae-voorkoms kon skep. [1]

’n Nadere beskouing van ’n stoppelbaard

’n Onlangse opname in die Verenigde Koninkryk het bevind dat vroue mans met stoppelbaarde as taai, volwasse, strydlustig, baasspelerig en manlik beskou, maar ook as die ideale minnaar, hetsy as losbol of as iemand wat vir ’n langtermynverhouding bestem is. [2]

Verwysings wysig

  1. "Hair's the Look That's in These Days (CNN:September 1, 1986)". Geargiveer vanaf die oorspronklike op 2 Februarie 2009. Besoek op 2 Februarie 2009.
  2. Dobson, Roger (29 Junie 2008). "Women prefer men with stubble for love, sex and marriage". The Telegraph (in Engels). Geargiveer vanaf die oorspronklike op 9 Februarie 2009. Besoek op 12 Oktober 2009.
Hierdie artikel is in sy geheel of gedeeltelik vanuit die Engelse Wikipedia vertaal.