Tweede Konsilie van Efese

Die Tweede Konsilie van Efese is in 449 byeengeroep deur keiser Theodosius II van Bisantium. Dit was veronderstel om ’n ekumeniese konsilie te wees, maar het die bynaam "Rowersinode" van pous Leo I gekry omdat ’n paar van die besluite afgedwing is deur die teenwoordigheid van gewapende soldate. Die besluite van die konsilie is twee jaar later herroep deur die Konsilie van Chalcedon.

Aanleiding wysig

In November 448 is die opperab Eutyches in Konstantinopel afgesit deur patriarg Flavianus omdat Eutyches nie wou instem met ’n teologiese formulering wat benadruk het dat Christus twee nature, een goddelik en een menslik, het nie. Eutyches was ’n aanhanger van monofisitisme, die opvatting dat Christus slegs een, goddelike natuur het. Keiser Theodosius II het toe ’n konsilie in Efese byeengeroep.

Die keiser het deur sy uitnodigings na die konsilie gesorg dat dit ’n eensydige samestelling het. Hy moes noodgedwonge die pous van Rome en die vier biskoppe van Konstantinopel, Antiogië, Alexandrië en Jerusalem nooi, maar die res van die teenwoordiges was meestal voorstanders van monofisitisme. Eutyches het ’n groot groep monnike saamgeneem en uit Egipte het ’n groot afvaardiging van monofisiete gekom onder leiding van biskop Dioscorus van Alexandrië. Die keiser self het gesorg vir ’n groep gewapende soldate.

Verrigtinge wysig

Die konsilie is op 8 Augustus 449 geopen onder die voorsitterskap van die monofisitiese biskop Dioscorus. Pous Leo I se afgesante wou dadelik ’n brief van die pous voorlees waarin hy Eutyches se idees veroordeel en kant kies vir biskop Flavianus. Die voorsitter het dit egter verbied. Nadat Dioscorus ’n gunstige verslag van die proses teen Eutyches gegee het, is die afsetting van die ab ongedaan gemaak. Toe hy Flavianus van Konstantinopel en Eusebius van Dorileum daarna wou afsit, het sommige biskoppe en ’n afgesant van die pous (sy latere opvolger, Hilarius) beswaar gemaak. Hierop het Dioscorus die keiser se gewapende soldate in die kerk laat inkom en die deure laat sluit. Die afgevaardigdes is toe gedwing om vir die afsetting van die twee biskoppe te stem.

Nasleep wysig

Flavianus en Eusebius is verban en die keiser het die besluite van die konsilie goedgekeur. Pous Leo I het die gebeure egter ongeldig verklaar en die konsilie ’n "rowersinode" genoem. Die keiser is kort daarna oorlede en is opgevolg deur Marcianus, wat gou ’n nuwe konsilie byeengeroep het. Die Konsilie van Chalcedon is op 8 Oktober 451 geopen. Hier is al die besluite van 449 by Efese herroep.

Verwysings wysig

  Hierdie artikel is vertaal uit die Nederlandse Wikipedia