Wild Atlantic Way

Die Wild Atlantic Way (Iers: Slí an Atlantaigh Fhiáin) is 'n toerismeroete langs die weskus en dele van die noord- en suidkus van Ierland wat in Februarie 2014 deur die destydse Ierse staatsminister van toerisme en sport, Michael Ring T.D., amptelik bekend gestel is. Dit is Ierland se eerste langafstandroete met 'n padlengte van 1 553 myl en strek van die Inishowen-skiereiland in die graafskap Donegal (sy mees noordelike punt naby die grens met Noord-Ierland) tot Kinsale, 'n nedersetting in die suide van in die graafskap Cork. Die doelwit is om die belangstelling van toeriste vir langer rondreise te wek en sodoende meer werksgeleenthede vir landelike gemeenskappe langs die Ierse weskus te skep.

Die sandstrande van Trawbreaga Bay in die graafskap Donegal

Hoofseksies

Die Cliffs of Moher is die bekendste kranse langs Ierland se Atlantiese kus

Keem Strand op Achill Island, graafskap Mayo

The Surf Coast: Uitsig oor die Dartry Mountains vanuit Mullaghmore Head

Vir bemarkingsdoeleindes word die roete - een van die langstes van sy soort ter wêreld - in ses seksies met spesifieke geografiese besonderhede onderverdeel:

• Northern Headlands,
• The Surf Coast,
• The Bay Coast,
• The Cliff Coast,
• Southern Peninsulas en
• The Haven Coast.

Aktiwiteite

Met die daarstelling van die Wild Atlantic Way as toerismeroete word 'n groot verskeidenheid toerismetrekpleisters en -aktiwiteite vir bemarking met mekaar verbind, waaronder meer as 500 besienswaardighede; meer as 1 500 verskillende aktiwiteite; 580 feeste en ander kulturele gebeurtenisse dwarsdeur die jaar; 17 kleiner roetes en 50 voetslaantoere; 53 blouvlagstrande en 120 gholfbane. Volgens die spesifieke belangstellings van besoekers word besienswaardighede en aktiwiteite gegroepeer om vir toeriste die gewenste reiservarings te bied:

• Exploring on the Edge: gee vir die toeris 'n indruk van die unieke landskappe en mikroklimaatsones langs die weskus, sy flora en fauna, grotte en myne en verbind en versterk die natuurervaring met aktiwiteite soos walvis- en dolfynkyk, bootstoere na unieke seelandskappe en die proe van plaaslike kosspesialiteite.
• Culture at the Edge: maak Ierland se unieke taal-, musiek- en danskultuur, sy unieke Gaeliese sportsoorte, tradisionele ambagte, groot feeste, eilandleefstyle, legendes en volksverhale toeganlik vir die besoeker.
• Active on the Edge: bemark die Ierse weskus se gewildste branderplankryplekke, wêreldklas-gholfbane, kusstaproetes, hengelsport en perdesport.

Eksterne skakels

Amptelike webtuiste

---

• Wild Atlantic Way

Beskrywings

---

• (en) Ireland.com: Wuild Atlantic Way
• (en) National Geographic: The Best of Ireland's Wild Atlantic Way
• (de) Wild Atlantic Way & Signature Points

Media

---

• Fáilte Ireland: Wild Atlantic Way