Amazon.com
Amazon.com, Inc. is 'n Amerikaanse multinasionale elektroniese handelsmaatskappy met sy hoofkwartier in Seattle, Washington. Dit is die wêreld se grootste aanlyn-handelaar. Daarnaas vervaardig Amazon ook elektroniese verbruikersware soos die Amazon Kindle-reeks van e-boeklesers en die Kindle Fire-tabletrekenaar en is een van die grootste verskaffers van wolkdienste vir internet-gebruikers. In Julie 2015 het Amazon.com Walmart verbygesteek om die grootste Amerikaanse handelsreus volgens markkapitalisasie ($250 miljard) te word.[1]
| Amazon.com, Inc. | |
  | |
| Tipe | Publieke maatskappy (corporation) |
|---|---|
| Gestig | 1994 |
| Stigter(s) | Jeffrey P. Bezos (voorsitter, president) |
| Hoofkantoor | Seattle, Washington (HQ2 in Crystal City, VA en New York, NY beplan), V.S.A. |
| Sleutelpersone | Andy Jassy, HUB Werner Vogels (Tegniese direkeur) |
| Gebied bedien | Wêreldwyd |
| Industrie | e-Handel |
| Produkte | A2Z Development, A9.com, Alexa Internet, Amazon.com, Amazon Kindle, Amazon Studios, Amazon Web Services, Audible.com, digital Photography Review (dpreview.com), Endless.com, Internet Movie Database (IMDb), LoveFilm, The Book Depository, Zappos.com, Woot, Junglee.com, goodreads.com, myhabit.com, askville |
| Dienste | Wolkdienste |
| Inkomste |  $177,866 miljard (2017) |
| Bedryfsinkomste |  $4,106 miljard (2017) |
| Netto inkomste | $3,033 miljard (2017) |
| Werknemers | 1 300 000 (2020) |
| Webwerf | www |
Amazon het tans nasionale aanlynwinkels in die Verenigde State, Kanada, Meksiko, Brasilië, die Verenigde Koninkryk en die Republiek Ierland, Frankryk, Duitsland, Oostenryk, Italië, Spanje, Nederland, Turkye, Japan, Indië, die Volksrepubliek China en Australië. Nederlandse, Poolse en Turkse weergawes van die Duitse Amazon-aanlynwinkel is reeds in 2016 geloods.
Die maatskappy is oorspronklik in Julie 1994 deur Jeff Bezos as Cadabra geïnkorporeer en het in 1995 as amazon.com aanlyn gegaan. Dit is na die Amasone-rivier in Suid-Amerika, een van die grootste riviere ter wêreld, genoem.[2] Aanvanklik het amazon.com as aanlyn-boekwinkel opgetree, maar sy besighede vinnig uitgebrei om ook kompakskywe, DVD's, MP3-lêers, sagteware, videospelletjies, elektroniese verbruikersware, klere, meubels, kos, speelgoed en juweliersware in te sluit.
In enkele Amerikaanse metropole het Amazon sy besigheidsbelange uitgebrei na vars en bevrore kos. Klante kan tussen 20 000 produkte kies wat deur Amazon se eie vloot vragmotors afgelewer word. In Februarie 2016 het die vierde grootste Britse supermarkketting Morrison's bekend gemaak dat hulle 'n strategiese alliansie met die Amerikaanse aanlynreus gesluit het. Klante, wat op Amazon se Prime- en Pantry-programme ingeteken het, sal kos aanlyn kan bestel.[3]
In September 2018 het Amazon.com donasies ter waarde van VSA-$1 miljoen aan die Wikimedia-stigting geskenk.[4]
Op 13 November 2018 het Amazon.com bekend gemaak dat die kampusse van sy tweede hoofkwartier in Long Island City, New York en Crystal City (in die noorde van die deelstaat Virginië) gevestig sal word. Die besluit, waaraan beleggings ter waarde van $5 miljard en die skepping van 50 000 nuwe goedbetaalde poste in die hoëtegnologiebedryf gekoppel sal wees, sal voor- en nadelige ekonomiese uitwerkings vir die metropolitaanse gebiede van New York en Washington, D.C. hê.
Verwysings wysig
- ↑ New York Times, 15 Augustus 2015: Inside Amazon: Wrestling Big Ideas in a Bruising Workplace
- ↑ Ann Byers: Jeff Bezos: The founder of Amazon.com. The Rose Publishing Group. Sien bl. 46-47
- ↑ www.spiegel.de, 29 Februarie 2016: Deal mit Supermarkt-Kette: Amazon will erstmals in Europa frische Lebensmittel liefern. Besoek op 29 Februarie 2016
- ↑ GeekWire, 25 September 2018: Amazon donates $1M to Wikipedia’s nonprofit parent organization. Besoek op 13 November 2018
Eksterne skakels wysig
- Tegnologie