Cadaqués

Cadaqués is 'n klein voormalige vissersdorpie met ongeveer 2 900 inwoners in die noordooste van die Iberiese Skiereiland in die Girona provinsie in die outonome gemeenskap Katalonië. Cadaqués is aan die rand van die Alt Empordà comarca in 'n baai naby die Cap de Creus skiereiland aan die Costa Brava van die Middellandse See geleë.

Cadaqués
Stad
'n Uitsig oor Cadaqués
Cadaqués
Koördinate: 42°17′00″N 3°17′00″O
Land	Spanje
Administratiewe gewes	Katalonië
Provinsie	Girona
Comarca	Alt Empordà
Regering
• Burgemeester	Joan Figueras i Pomés
Oppervlak
• Totaal	15,62 km2 (6,03 vk. myl)
Hoogte	23 m (75 ft)
Bevolking
• Totaal	2 935
• Digtheid	190/km2 (490/vk. myl)
Tydsone	UTC+1 (MET)
• Somertyd	UTC+2 (MEST)

Geskiedenis

Toneel van Cadaqués

Die oudste geskiedkundige dokumente wat na die dorp verwys dateer uit die jaar 1030. Die belangrikste geboue wat van die ou dorp en sy versterkings bewaar is, is die vesting, wat tans die kantore van die plaaslike administrasie (Ajuntament) huisves, en 'n poort na die strand. As gevolg van sy ligging tussen rotse wat tot by die see strek, was Cadaqués van die omliggende gebiede afgesny en eeue lank net vanuit die see toeganklik.

In 1444 is die dorp tydens 'n seerowerinval afgebrand. Teen die einde van die 19de eeu het die druifluis groot skade in die plaaslike wingerde berokken.

Cadaqués is vandag 'n toeristeoord en tydens die toeristeseisoen styg die bevolking tienvoudig.

Kunslewe

Die rustigheid van die dorp het steeds 'n groot aantal kunstenaars en intellektueles gelok, en Cadaqués het veral as 'n gewilde verblyfplek vir skilders en beeldhouers bekend gestaan.

Die kunstenaar Salvador Dalí het die dorpie in sy kinderdae gereeld saam met sy familie besoek en het later 'n huis in Port Lligat, 'n klein baai naby die dorpie, gehad. Dit was juis tydens die somervakansie van 1916 wat Dalí moderne skilder ontdek het by die familie van Ramon Pichot. Die eerste kunstenaar wat hom in Cadaqués gevestig het was Mei Fren wat indrukwekkende houtskoolsketse van die 19de eeuse Cadaqués gemaak het. Pablo Picasso, Joan Miró, Marcel Duchamp, Antoni Pitxot, Henri-François Rey, Melina Mercouri en Maurice Boitel het ook tyd in die dorpie spandeer. Cadaqués word ook genoem in die storie Tramontana deur Gabriel García Márquez.

Besienswaardighede

Op die hoogste plek van die ou dorpskern verrys die kerk Santa Maria, wat vanaf die middel van die 16de eeu in die Laat-Gotiese boustyl opgerig en in die 18de eeu voltooi is. Die kerk besit 'n altaarstuk in die barokstyl, wat deur Jacint Moretó ontwerp en deur Pau Costa uitgevoer is. Die altaarstuk is in 1725 van hout gemaak en in 1788 vergoud.

Strandfront van Cadaqués

Panorama van Cadaqués