Maak hoofkeuseskerm oop
Dr. C.J.S. Strydom.

Dr. Christiaan Johannes Scheepers Strydom (distrik Uniondale, Kaapkolonie, 5 Mei 1902Kaapstad, Suid-Afrika, 19 Januarie 1986) was ’n onderwyser, koerantman en skrywer.

Strydom was een van die vyf seuns en drie dogters wat gebore is uit die huwelik van Marthinus Andries Strydom en Christina Johanna Petronella le Roux. Omdat Strydom in die Driejarige Oorlog gebore is, het hy die name van Boere-offisiere gekry: Christiaan van genl. De Wet en Scheepers van nog ’n bekende Boere-aanvoerder. In die middel moes ’n familienaam noodwendig ingevoeg word.

Strydom het sy loopbaan as onderwyser begin en hy was later hoof van die Afrikaansmediumskool in Observatory, Kaapstad. (Die bron vermeld dit nie, maar dit kon net die Laerskool Nassau gewees het, want mnr. Christiaan Jozua van Dijk is einde 1934 as eerste hoof van die sekondêre afdeling, waaruit die Hoërskool Nassau ontstaan het, aangestel. Dit was die enigste twee Afrikaansmediumskole in die voorstad.)

In 1938 is Strydom aangestel in die redaksie van die Afrikaanse, VP-gesinde Kaapse middagblad, Die Suiderstem. Nadat hy as redakteur gedien het, is hy bevorder tot algemene bestuurder van die Unievolkspers Beperk.

Van sy hand het onder meer die volgende werke verskyn: Waar die driedorings groei (1933), Kaapland in die Tweede Vryheidsoorlog (1937) en Seniors (1945). Hy was ’n bydraer tot die vyfdelige Die Afrikaner en sy kultuur, wat in die jare sewentig verskyn het.

BronneWysig

  • (af) Nienaber, P.J. Hier Is Ons Skrywers! Biografiese Sketse van Afrikaanse Skrywers. Johannesburg: Afrikaanse Pers-Boekhandel.