Clarence House
Clarence House is die koninklike woning van die Prins van Wallis in Londen wat aan "The Mall" geleë is. Dit is aan Sint James-paleis vas en deel die paleis se tuin. Byna 50 jaar lank, van 1953 tot 2002, was dit die tuiste van koningin Elizabeth die koninginmoeder, maar daarna was dit die amptelike woning van Charles, Prins van Wallis (nou Charles III), en Camilla tot met Charles se troonbestyging in 2022. Dit is sowat twee maande per jaar in die somer oop vir besoekers.[1]
Die huis is tussen 1825 en 1827 na ’n plan deur John Nash gebou vir koning William IV, wat as die Hertog van Clarence bekend was voor hy die troon in 1830 bestyg het. Sy suster prinses Augusta Sophia het dit geërf en daarna, in 1840, Prinses Victoria van Sakse-Koburg-Saalfeld, die ma van koningin Victoria. In 1866 het dit die tuiste geword van koningin Victoria se tweede oudste seun, prins Alfred, Hertog van Sakse-Koburg en Gotha, tot met sy dood in 1900. Sy jonger broer, prins Arthur, Hertog van Connaught en Strathearn, het die huis van 1900 tot met sy dood in 1942 gebruik. Dit is in die Tweede Wêreldoorlog erg deur bomme beskadig en is vir die res van die oorlog deur die Rooi Kruis en St. John Ambulance gebruik as hul hoofkwartier. Daarna is dit aan prinses Elizabeth en haar man, die Hertog van Edinburg, gegee. Prinses Anne is in 1950 daar gebore. Ná die dood van George VI het die koninginmoeder en prinses Margaret in 1953 daar ingetrek, hoewel Margaret later na ’n woonstel in Kensington-paleis getrek het.
Verwysings wysig
- ↑ HAT Taal-en-feitegids, Pearson, Desember 2013, ISBN 978-1-77578-243-8
Eksterne skakels wysig
Wikimedia Commons het meer media in die kategorie Clarence House.
Hierdie artikel is vertaal uit die Engelse Wikipedia
