Daljosafat

Daljosafat (ook Dal Josafat of Dal van Josafat) is 'n nywerheidsgebied in die vallei tussen Wellington en die Paarl geleë. Die meeste van die Paarl se nywerhede is hier gevestig. 'n Begraafplaas vir die Hugenote is hier aangelê. Die Afrikaanse taalstryder en eerste redakteur van Di Patriot, ds. Stephanus Jacobus du Toit is in 1847 hier gebore en sy broer die Hervormde predikant ds. C.W. du Toit vyf jaar vantevore. Talle van die Afrikaanse Patriotte is hier begrawe.

Etimologie

Die naam kom uit die Bybel, en verwys na die oordeelsplek waarna in Joël 3:1-2 verwys word (1953-Vertaling):

¹ Want kyk, in dié dae en in dié tyd wanneer Ek die lot van Juda en Jerusalem verander, ² sal Ek al die nasies versamel en hulle na die dal van Jósafat laat aftrek, om daar met hulle 'n strafgerig te hou ter wille van my volk en my erfdeel Israel wat hulle onder die nasies verstrooi het, en my land wat hulle verdeel het.

Plase

Die bekendste historiese plase in die streek is Calais, Non Pareille. Schoongezicht, Kleinbosch, Rust en Werk en St. Omer.

Sien ook

• Kleinbosch-begraafplaas
• Lys van dorpe in Suid-Afrika

Bronne

• Coertzen, Pieter: Die Hugenote van Suid-Afrika 1688 - 1988. Kaapstad: Tafelberg, 1988. ISBN 0-624-02618-3
• Raper, P.E., Dictionary of South African Place Names, Lowry Publishers, Johannesburg, 1987.
• 1953-vertaling van die Bybel