Francois van Coke

(Aangestuur vanaf Francois Badenhorst)

Francois Badenhorst (*18 September 1980; Brakpan, Gauteng), is ’n Suid-Afrikaanse sanger, liedjieskrywer en stigterslid van die Suid-Afrikaanse alternatiewe rockgroepe Fokofpolisiekar, Van Coke Kartel en Die Gevaar. In 2016 het Van Coke sy debuutsolo-album vrygestel.

Francois van Coke
Agtergrondinligting
GeboortenaamFrancois Badenhorst
Gebore18 September 1980 (1980-09-18) (43 jaar oud)
Brakpan, Gauteng, Suid-Afrika
Beroep(e)Sanger, liedjieskrywer
InstrumenteKitaar
Jare aktief2003–huidig
AssosiasiesAS180[1]
A Guy Called Gerald
New World Inside
Fokofpolisiekar
Van Coke Kartel
Karen Zoid
Francois van Coke

Van Coke het in Bellville, Wes-Kaap grootgeword. Daar het hy onder andere deelgeneem in die hoërskole se battle of the bands -kompetisies waar hy opgetree het as voorsanger. Van Coke se sterk Christelike opvoeding (sy pa was ’n dominee) het hom gelei tot die totstandkoming van die Christelike musiekgroep AS180. Van Coke het homself in die Bellville se ondergrondse musiekbedryf gevestig met die stigting van die groep “A Guy Called Gerald”.

Hierdie groep het later hul naam verander na “New World Inside” wat ’n sterk pop-punk-invloed gehad het. In 2003, met die stigting van die bandgroep Fokofpolisiekar behaal Van Coke landswye bekendheid en herdoop homself na “Francois van Coke”. Die groep is aanvanklik begin as ’n grap om die konserwatiewe Afrikaanse gemeenskap te skok. Van Coke herinner hom dat sy “… ma het gehuil vir ’n dag of twee toe sy die naam van die groep gehoor het”.[1]

Loopbaan wysig

Francois van Coke (2015) wysig

Op 8 April 2015 het Francois sy selfgetitelde debuutalbum bekendgestel met die vrystelling van die ballade Toe vind ek jou, met Karen Zoid. Dit was die eerste Suid-Afrikaanse en Afrikaanse enkelsnit en album wat tergelyke tyd die nommer 1 posisies op iTunes se Top 40 treffersparades gehaal het. Die liedjie het ook Platinumstatus bereik, omrede dit meer as 20 000 keer afgelaai is. Die musiekvideo is binne ses maande meer as 8 miljoen keer op YouTube gekyk en is aangewys as die grootste Afrikaanse musiekvideo van 2015.

Francois se mening oor die lied, Toe vind ek jou:

“Dit was vir my ‘n groot voorreg om deel te wees van daardie song. Die reaksie was net massief van dag een af en so baie mense het aanklink gevind daarby. Dit is net ‘n eerlike love song oor my en my vrou se verhouding. Dit was ook ‘n groot eer om saam met Karen Zoid aan die song kon skryf en opneem.”


Hierdie is die lewe (2017) wysig

Francois en sy groep Die Gevaar het saam aan die liedjies geskryf. Die album is vervaardig deur Johnny de Ridder (Fokofpolisiekar) en Rudolph Willemse (Die Gevaar se baskitaarspeler). Die lied Hierdie is die lewe het was vir 'n week nommer 1 op iTunes en was vir 5 weke op die Top 10.Die album was vir 5 weke op die SA Top 20, gegrond op albumverkope, en vir 3 aaneenlopende weke in die top 2 posisies op Pretoria fm se treffersparade. Dit raak beter, was op 45 radiostasies landswyd gespeel vandat dit op 2 Februarie vrygestel is. Mensdom en Die wêreld is mal was ook groot gunstelinge en laasgenoemde het nommer 3 posisie behaal op kykNET se Top 20 musiekvideo's van 2017.

Francois van Coke & Vriende 2018 (2018) wysig

Die vriende wat saam met Francois van Coke opgetree het by die Francois van Coke & Vriende optrede, was die inspirasie vir sy tweede album. Die album se enkelsnitte is 'n mengsel van kletsrym, punk en hip-hop - alles 'n bewys van die sanger se diversiteit en talent. Die liedjies op die album is:

  1. Ek lewe ek belowe ft. Die Heuwels Fantasties
  2. Altyd lief vir jou ft. Early B
  3. Spaar my asseblief ft. Laudo Liebenberg
  4. Moenie bang wees nie ft. Jack Parow

Francois van Coke oor die album:

“Al vier van die kunstenaars op die EP is deel van die ‘Francois van Coke & Vriende’ produksie. Ek wou hierdie jaar nuwe musiek vrystel voordat ek my derde vollengte solo album uitsit in 2019.  Nadat alles lekker bymekaar gekom het vir die show in Pretoria, het dit soos ‘n goeie idee gevoel om saam met van hierdie vriende nuwe musiek te skryf. Met behulp van Red Bull Studios Cape Town en Jägermeister, het ons ‘n EP gemaak wat great klink.  Dit gaan awesome wees om ‘n song soos ‘Altyd lief vir jou’ met Early B vir die eerste keer op te voer by die Sun Arena.”

Dagdrome in Surbubia (2019) wysig

Op 18 Oktober 2019, het hy sy derde solo album, Dagdrome in Surbubia, vrygestel voor 'n uitverkoopte Sun Arena in Pretoria met 9 700 mense, wat dit sy grootste albumbekendstelling nog maak. Die album skop af met die voorlesing van Riaan Cruywagen, gevolg deur kletsrymer, Riky Rick, Spoegwolf, The Voice SA 3 se wenner, Tasché en Fokofpolisiekar se Hunter Kennedy.

Die veldtog vir die album het in Augustus 2019 afgeskop met die vrystelling van die album se eerste enkelsnit en musiekvideo saam. Die liedjie, met dieselfde naam as die album, met Spoegwolf het baie afwagting veroorsaak vir die koms van die nuwe album. Die album het nommer 1 op iTunes afgeskop en geklip tot by nommer 5 op die Apple Music se ranglys.

Op die dag van die album se vrystelling en die Francois van Coke & Vriende vertoning (18 Oktober), het Francois en Hunter Kennedy die tweede enkelsnit se musiekvideo ook vrygestel, getiteld: Daarsy boys.

'n Uittreksel uit die liedjie:


ek’s net ‘n anargis wat bly in die burbs

ek’s net ‘n anargis wat eet by die Spur

ja, ons eet by die Spur


As ek kon is 'n klavier-gedrewe ballade wat vir Francois van Coke se dogtertjie, Alex Lila, geskryf is. Karen Zoid en Francois het saam aan hierdie liedjie geskryf. Die enigiste Engelse lied op die album is Not Like Them, saam met Riky Rick, wat Francois tydens The Voice SA 3 ontmoet het.

Francois van Coke & Vriende wysig

Om 'n nalentenskap as ikoon en pionier te vier, is hierdie vertoning gehou op 15 September 2018 by die Sunarena in Pretoria. Die opvolg vertoning was net so suksesvol op 18 Oktober 2019. Francois van Coke oor hierdie vertoning en inisiatief:

''Al wat ek nog altyd wou doen was rugby speel of musiek maak. Musiek het my gekies en ek het die voorreg gehad om saam met van die beste Suid-Afrikaanse kunstenaars te skryf. Ek en 9 van hierdie vriende gaan 'n massiewe show in Pretoria gooi.  Die 120 minute show gaan gepak wees met my mees bekendse songs en die vriende gaan my op stage join."

Dieselfde vertonings is ook in Kaapstad gehou by die Grand Arena.

Televisiewerk wysig

Die Van Coke Show wysig

Francois het sy eie televisieprogram op kykNET se kanaal afgeskop op 8 Oktober 2018. Die program het uit 13 episodes bestaan. Dit is 'n speletjies- en geselsprogram waartydens die draak gesteek word met met bekende persoonlikhede.

The Voice - Seisoen 3 wysig

In November 2018, is Francois aangekondig as die vierde afrigter vir die derde seisoen van The Voice South Africa, 'n realiteitsprogram wat gemik is daarop om nuwe sangtalent te werf onder die publiek.


Toekennings wysig

  • Ghoema toekenning vir: Beste Alternatiewe Album
  • Wes-Kaapse Bokkies: Toekenning vir Sanger van die jaar. (2017)
  • OFM Golden Note: Plaaslike liedjie van die jaar: Toe vind ek jou
  • Silwer Pendoring - craft: Toe vind ek jou - musiekvideo

Van Coke Studios wysig

Francois van Coke en die lede van sy sologroep, Die Gevaar: Jedd Kossew en Richard Onraet het in Groenpunt, Kaapstad hul eie ateljee oopgemaak.


Bronne wysig

  • Verskeie persverklarings en foto's ontvang deur groep se bestuurder.

Verwysings wysig

  1. 1,0 1,1 Flowerday, Wayde. "Onderhoud: Francois van Coke". Music Review (in Engels). Geargiveer vanaf die oorspronklike op 4 Maart 2016. Besoek op 16 Julie 2014.

Eksterne skakels wysig