Gereformeerde kerk Karasburg
Die Gereformeerde kerk Karasburg is die mees suidelike gemeente van die Gereformeerde Kerke in Namibië en ook die kleinste met einde 2014 net 12 belydende en twee dooplidmate. Buiten die hoofdorp, Karasburg, sluit die gemeente ook plekke soos Ariamsvlei, Grünau, Noordoewer, Oranjemund en Warmbad in Namibië, en Alexanderbaai, Port Nolloth en Springbok in Suid-Afrika in.
| Gereformeerde kerk Karasburg | ||
| ||
| Sluit in | Ariamsvlei Grünau Noordoewer Warmbad | |
| Klassis | Etosha | |
| Huidige predikant(e) | Vakant | |
| Belydende lidmate | 17 | |
| Dooplidmate | 6 | |
| Adres | Hoofstraat Karasburg Namibië | |
| Geskiedenis | ||
| Stigtingsdatum | 1966 | |
| Afgestig van | Keetmanshoop | |
| Eerste predikant | B. van der Walt 1966–1969 | |
Gereformeerde lidmate in die suide van Suidwes-Afrika het van 1936 af op Keetmanshoop vergader waar die Gereformeerde kerk Keetmanshoop op 28 Junie 1936 gestig is. Karasburg het in 1955 'n wyk van die Gereformeerde kerk Keetmanshoop geword, dieselfde jaar waarin drie nuwe gemeentes in Suidwes gestig is, naamlik Tsumeb, Otjiwarongo en Vanjaarsveld. In 1966 het Karasburg 'n selfstandige gemeente geword, dieselfde jaar as Mariental, ook ’n dogtergemeente van Keetmanshoop.
In die laat vyftigerjare het die gemeente aan huis van Baartjie Viviers, 'n lidmaat van die NG gemeente Karasburg vergader. Dié huis was van 1943 tot 1952 'n skoollosieshuis vir plaaskinders. Daar was ’n groot vertrek wat as slaapkamer vir seuns gedien het en wat van 1955 af ingerig is vir kerkdienste. Stoele moes voor en ná elke diens aangery word, wat nie bevorderlik vir gemeentegroei was nie.
Gevolglik is ’n gemeentevergadering in 1959 onder voorsitterskap van ds. H.A. Louw van Keetmanshoop gehou waarop besluit is om 'n eie kerkgebou te bekom. Oudl. J. Landsberg het op dié vergadering £500 aangebied en belowe die res kom later. Met hierdie bydrae is die boufonds geopen, en in 1961 is die kerkgebou (met eie kerkbanke) in gebruik geneem. Gegewe die geskiedenis van stoele aanry, was die bate van eie kerkbanke ’n groot gebeurtenis vir die lidmate. Die kerkklok was 'n geskenk van Johannes von Moltke, LV vir die kiesafdeling Karas. Omdat die kerkgebou langs die seunskoshuis geleë was, was dit vir skoolseuns 'n versoeking om die klok om middernag te lui. Weens dié kattekwaad het die kerkraad weldra besluit om die klok stil te maak.
Karasburg is vroeg in die 21ste eeu erg geraak deur die wegtrek van lidmate. Van sowat 50 belydende lede omstreeks 1997 het hulle afgeneem tot 15 in 2008 en 12 einde 2014. Nadat die gemeente dekades lank in kombinasie met Keetmanshoop was, het die gemeente oorgegaan tot ’n bedieningsooreenkoms met Upington.
Predikante wysig
- Opperman, dr. Wilhelm Carl, 1979–1983 (in kombinasie met Keetmanshoop)
- Coetzee, Dawid Francois, 1984–1991 (in kombinasie met Keetmanshoop)
- Van der Merwe, Jacobus Lukas Marthinus, 1991–1993 (in kombinasie met Keetmanshoop; verlaat die bediening)
- Van Deventer, Hendrik Johannes Marthinus, 1994 (in kombinasie met Keetmanshoop; verlaat die bediening)
- Buys, Louis Johannes, 1995–1999 (in kombinasie met Keetmanshoop)
- Fourie, Matthys Petrus, 1999–2003 (in kombinasie met Keetmanshoop)
- Venter, Maarten Petrus Albertus, 2003–2006 (in kombinasie met Keetmanshoop)
Bronne wysig
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (en) Potgieter, D.J. (hoofred.) Standard Encyclopaedia of Southern Africa. Cape Town: Nasionale Opvoedkundige Uitgewery Ltd., 1973.
- (en) Raper, P.E. 1987. Dictionary of South African Place Names. Johannesburg: Lowry Publishers.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
- (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
- (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.