Geskiedenis van perde in Suid-Afrika

Daar is geen perderasse wat inheemse aan Suid-Afrika is nie. Die naaste familie van die perd wat inheems is, is die sebra.

Die eerste perde in die Kaap

Aanvanklik het die Here XVII vir Jan van Riebeeck laat weet dat hulle nie aan sy dringende versoek om perde kon voldoen nie en dat hy van die gestreepte wilde perde moet vang en tem. Die pogings het nie geslaag nie.

In 1653 het ‘n retoervloot vier perde uit Java aan die Kaap De Goede Hoop afgelaai. Tussen 1659 en 1689 is verskeie kere perde ingevoer, elke keer net ‘n klein hoeveelheid.

Al hierdie diere was van Oosterse oorsprong (die Arabiese tipe). Die gehalte van die diere wat aanvanklik swak was, het gaandeweg verbeter onder die invloed van Goewerneur Simon van der Stel. Die besending van 1689 tydens sy dienstydperk, was rasegte Arabiere uit Persië.

Boerperd

In 1676 is die eerste berede mag teen die Boesmans (die San) uitgestuur deur die Nederlanders in die Kaap. In die 200 jaar wat daarop gevolg het, het die Suid-Afrikaanse Boerperd groot roem verwerf. Dit wasveral tydens die Suid-Afrikaanse Vryheidsoorloë (Anglo-Boereoorloë) en op verskeie slagvelde van Europa en Indië.

Geteel uit die oorspronklike Oosterse merries met latere byvoegings van die Engelse volbloed, is hierdie ras baie geliefd.

Daar is baie Boerperde in Suid-Afrika maar hulle getalle was beperk toe hulle stadigaan veld teen die swierige Amerikaanse saalperd verloor het. Tans floreer die ras weer.

Hoewe en hoefbeslag

Die perd is net so goed as sy pote is ‘n baie paslike gesegde. Die harde horingagtige hoef, wat ovaalvormig tot rond is, beskerm die voetbeen van die perd. In die loopvlak van die harde hoef is daar elastiese straalkussings wat as skokbrekers dien. Die hoefrand kan teen beskadiging beskerm word deur die perd te beslaan met Hoefysters wat met behulp van spesiale spykers aan die hoef vasgenael en vasgetrek word. Dit behoort deur ‘n ervare persoon (hoefsmid) gedoen te word. Die gevaar bestaan dat die spykers die binneste, “lewende” deel van die hoef kan binnedring. Dan word die perd kreupel.

Sien ook

Bronnelys

Kennis, vol 2, bl. 382-383, ISBN 0 7981 0824 X