Graafskap Kildare
Die Graafskap Kildare (Iers: Contae Chill Dara, Engels: County Kildare) is een van die 32 graafskappe waarin die Republiek van Ierland (Éire) vir administratiewe doeleindes verdeel word. Die naamgewende nedersetting is Kildare, alhoewel Naas as die graafskapsraad (county council) se administratiewe setel dien. Die geografiese nabyheid aan die Ierse hoofstad Dublin, sy natuurskoon en rustige landelike karakter maak van die graafskap 'n gewilde vestigingsgebied vir hoofstadbewoners. Kildare, wat in die historiese Ierse provinsie Leinster geleë is, is tans een van die welvarendste en mees digbevolkte streke van Ierland.[1] Volgens die sensus van 2016 het Kildare 'n bevolking van 222 130.[2]
County Kildare Contae Chill Dara (Iers) | |
|---|---|
Graafskap | |
 Uitsig oor die vlaktes van Suid-Kildare, met die Wicklow-berge in die agtergrond | |
| Leuse(s): Meanma agus Misneach | |
.svg) Ligging van Kildare in Ierland | |
| Koördinate: 53°10′00″N 6°45′00″W / 53.16667°N 6.75°WKoördinate: 53°10′00″N 6°45′00″W / 53.16667°N 6.75°W | |
| Land |  Ierland |
| Oppervlak | |
| • Totaal | 1 695 km2 (654 vk. myl) |
| Bevolking | |
| • Totaal | 222 130 |
| Afkorting (nommerplate) | KE |
| Webwerf | kildare.ie |
Histories is Kildare sedert die Middeleeue deur die Fitzgerald-familie vanuit hul kasteel in Maynooth oorheers. Die Fitzgeralds het die gebied in 1176 ná die Normandiese inval in Ierland uit die hand van die Engelse koning se hoofminister in Ierland (Lord Chief Justice of Ireland) Richard de Clare, 2de graaf van Pembroke (genoem Strongbow of Arc-Fort, 1130–1176), ontvang. In die tyd van die Protestantse Hervorming het die Fitzgeralds die nuwe geloof aanvaar en sodoende hul politieke invloed ook onder Protestantse Engelse bewind gehandhaaf.
Die Maynooth-kasteel is nou net 'n bouval, maar danksy die nabyheid van Dublin het 'n groot verskeidenheid herehuise in Kildare ontstaan wat bewaar gebly het. Castletown House, 'n statige herewoning in die Georgiaanse styl in Celbridge, word as die mees gesofistikeerde voorbeeld van dié familiesetels beskou. Voordat dit in 1994 staatsbesit geword het, was dié herehuis die grootste privaat woning in die Ierse Republiek. Ander belangrike historiese besienswaardighede sluit twee historiese 18de eeuse kanale, Grand Canal en Royal Canal, in wat voor die koms van spoorweë en motorpaaie die vernaamste vervoerroetes na die Ierse binneland was en Dublin in die ooste met die Shannonrivier in die weste van Ierland verbind het. Die kanale is vir sport- en ontspanningsdoeleindes herstel en heropen, met wandelpaaie langs hul oewers.
Verwysings wysig
- ↑ Ralph-Raymond Braun: Irland. Erlangen: Michael Müller Verlag 2012, bl. 213
- ↑ "Census 2016: Kildare's Population Change, By Electoral District. Besoek op 4 Junie 2017". Geargiveer vanaf die oorspronklike op 10 Mei 2017. Besoek op 4 Junie 2017.