Harriman Institute
Die Harriman Institute, wat aan die Columbia-universiteit te New York verbonde is, is een van die wêreld se leidende akademiese instellings wat op Russiese, Eurasiese en Oos-Europese studies fokus. Dit is die oudste navorsingsinstelling op hierdie gebied in die Verenigde State.[1]
Geskiedenis wysig
Die instituut is in 1946 gestig as die eerste akademiese sentrum in die Verenigde State wat aan interdissiplinêre navorsing oor Rusland en die Sowjetunie gewy is.[2] Die instelling, wat aanvanklik as Russian Institute bekend gestaan het, is onder meer deur die Rockefeller-stigting (Rockefeller Foundation) geborg.
Die Russian Institute is in 1982 amptelik hernoem as W. Averell Harriman Institute for the Advanced Study of the Soviet Union, ter waardering van goewerneur Harriman (1891−1986) se grootmoedige bydrae tot die instituut en die lewenslange voortreflike diens wat hy gelewer het - onder meer as een van die VSA se leidende diplomate in Moskou gedurende die Tweede Wêreldoorlog en die Koue Oorlog wat daarop gevolg het. Harriman, die seun van die spoorwegmagnaat Edward Henry Harriman (1848−1909), was 'n demokratiese politikus, sakeman en diplomaat wat onder president Harry S. Truman tussen 1946 en 1947 as Minister vir Handel (Secretary of Commerce) gedien en later die amp van 48ste goewerneur van die deelstaat New York beklee het. Hy is daarnaas benoem as Amerikaanse ambassadeur in die Sowjetunie (1943−1946) en in die Verenigde Koninkryk (April tot Oktober 1946). Harriman het ter geleentheid van die Harriman Institute opgemerk:
Die doelwit, wat ek gestel het, is baie duidelik: Ek wil die gevorderde wetenskaplike navorsing oor die Sowjetunie aanwakker. Dit is baie gevaarlik om 'n politieke beleid op onkunde en illusies te grond. 'n Beleid moet op kennis en begrip baseer.
Ná die verbrokkeling van die Sowjetunie het die instituut sy fokus in 1992 uitgebrei om alle opvolgerstate van die Sowjetunie asook voormalige Oosbloklande in te sluit. Die instituut se naam is gewysig tot Harriman Institute. In 1997 is die Harriman Institute begin saamwerk met die East Central European Institute om komparatiewe akademiese navorsing en kennis en openbare begrip vir die ingewikkelde en vinnig veranderende politieke situasie en entiteite, ekonomieë, samelewings en kulture van die uitgestrekte gebied tussen Duitsland en die Stille Oseaan te bevorder. Die East Central European Center is in 2017 amptelik met die Harriman Institute saamgesmelt. Die instelling word deur twee mededirekteurs bestuur.
Verwysings wysig
- ↑ Robert L. Belknap: The Genesis of "The Brothers Karamazov". The Aesthetics, Ideology, and Psychology of Text Making. Evanston, IL: Northwestern University Press 1990, bl. ix
- ↑ Columbia University, New York: The Russian Institute. In: The Slavonic Review, volume 64, 1946, bl. 214-215 (Internet Archive)
Eksterne skakels wysig
- Amptelike webtuiste
- Publikasies
- Media