Henry Rowe-Rowe
Henry Rowe-Rowe (Great Gaddesen, Hertfordshire, Engeland, 6 Julie 1870 – waarskynlik Johannesburg, 9 Desember 1930) was ’n Suid-Afrikaanse argitek van Britse herkoms wat huise, woonstelle, winkels, sakegeboue en sover bekend een kerk (die destydse kerkgebou van die Gereformeerde kerk Johannesburg-Suid) ontwerp het.
Lewensloop wysig
Rowe-Rowe was die tweede seun van William Henry Rowe (Henry het eers later die van “Rowe-Rowe” aangeneem) en het sy opvoeding ontvang aan die Norton College, Luton, Bedfordshire. Nadat hy ’n ruk lank vir sy vader, ’n bouaannemer, gewerk het, het hy na Londen verhuis waar hy hoofassistent van H. Woodzell van Tottenham Court Road geword het. In 1893 het hy na die Kaap geïmmigreer en in die moederstad die hoofassistent van die Kaapse argitek Max Rosenberg geword. Rowe-Rowe is in 1897 getroud met Florence Elizabeth, tweede dogter van Andrew White van Wynberg, Kaap. Drie kinders is uit die huwelik gebore.
Rowe-Rowe het in 1899 of 1900 sy eie praktyk opgerig. Sy vernaamste werk was as argitek van woonhuise en so het hy gehelp met die ontwikkeling van Kampsbaai en Oranjezicht. In 1911 het hy na Transvaal verhuis en teen 1915 op Krugersdorp gewoon en daarna na Johannesburg verhuis waar hy ook hoofsaaklik woonhuise asook woonstelblokke ontwerp het. Blykbaar het hy hoofsaaklik as landmeter gewerk.
Verenigings wysig
Hy was lid van die FCIA, Suid-Afrikaanse Instituut van Landmeters, die Vereniging van Transvaalse Argitekte. Rowe-Rowe was ook ’n vooraanstaande Vrymesselaar. Hy het op 23 April 1896 by die Wynbergse Losie aangesluit en op 10 November 1914 daaruit bedank. Op 30 Oktober 1903 was hy ’n stigterslid van die losie in Mowbray, tot hy daaruit bedank het op 15 April 1907. Op 17 Mei 1905 is hy erelid van dié losie gemaak en was blykbaar ook meester van die Stellenbosse Losie. Hy was ook lid van die beheerraad van die Tegniese Hoërskool Forrest Hill, ’n ouderling van die Anglikaanse Christ Church in die Goudstad, lid van die Wetenskaplike en Tegniese Klub van Johannesburg. In Johannesburg was sy praktyk geleë by Commercial Exchange Buildings 3, Mainstraat 81.
Glynville Terrace wysig
Een van sy imposante Victoriaanse projekte, Glynville Terrace in Tuine, Kaapstad, is middel 1989 tot nasionale gedenkwaardigheid verklaar. Dis oorspronklik op die plaas Krynauw-se-Hof gebou. Die landgoed is later by die Goeie Hoop-Seminarie aan die oorkant van die straat, ingelyf. 'n Ry skakelhuise, almal deur Rowe-Rowe ontwerp, is deur die boukontrakteur Glynville gebou. Rowe-Rowe het gespesialiseer in die ontwerp van dié huise, asook dié van die ontwikkeling van Kampsbaai, Tuine en Oranjezicht.
Bronne wysig
- (en) Besonderhede op die webtuiste Artefacts.co.za. URL besoek op 5 Februarie 2016.
- Woongids, Die Burger, 3 Junie 1989.
Eksterne skakels wysig
- (en) Glynville Terrace, soos te sien op Google Maps. URL besoek op 7 Februarie 2016.