Feodor Ingvar Kamprad ([ˈɪŋːvar ˈkamːprad] ; * 30 Maart 1926 in Pjätteryd; † 27 Januarie 2018 in Liatorp) was 'n Sweedse sakemagnaat en stigter van Ikea, 'n multinasionale kleinhandelonderneming wat hom op bekostigbare slaan-dit-self-aan-mekaar-meubels toespits. Die meubelsaak se naam is 'n akroniem wat vir die stigter en sy geboorteplaas Elmtaryd in Agunnaryd, provinsie Småland, Swede staan.

Ingvar Kamprad
Ingvar Kamprad in 2010
Gebore
Feodor Ingvar Kamprad

(1926-03-30)30 Maart 1926
Pjätteryd, Swede
Sterf27 Januarie 2018 (op 91)
Älmhult, Swede
NasionaliteitVlag van Swede Swede
BeroepSakemagnaat
Bekend virdie stigting van Ikea
EggenootKerstin Wadling (1950–1960; geskei)
Margaretha Stennert (1963–2011; haar dood)[1]
Kinders4[2]
Ouer(s)Frans Feodor Kamprad en Berta Linnéa Matilda Nilsson

Kamprad het Ikea in 1943 op die ouderdom van 17 op die plaas van sy ouers gestig. In die beginjare kon klante items soos vuurhoutjies, bolpuntpenne, nylonkouse of horlosies, vanaf 1947 ook meubels per pos bestel (die eerste katalogus, wat in 1951 verskyn is, is nog deur melkmans versprei). Kamprad het 'n groot deurbraak gemaak met die idee om meubels te bemark wat – om vragkoste te bespaar – as slaan-dit-self-aan-mekaar-pakkette aangebied is. Eers twintig jaar later is die eerste Ikea-meubelwinkel in Älmhult geopen. Die meubelsaak het vinnig gegroei. In 1974 is die eerste meubelwinkel in München, Beiere, geopen. Duitsland het vervolgens tot Ikea se belangrikste buitelandse mark ontwikkel.

Ingvar Kamprad, wie se fortuin in Januarie 2018 deur die Amerikaanse sakenuusdiens Bloomberg op VSA-$58,7 miljard beraam is (Kamprad is agste gelys in Bloomberg se lys van die wêreld se 500 welvarendste miljardêrs[3]), het 'n reputasie vir spaarsaamheid opgebou – 'n eienskap wat tradisioneel aan Smålanders toegeskryf word. So het hy 'n 15 jaar oue Volvo-motor bestuur en steeds tweede klas gereis. Hierdie spaarsaamheid het egter ook daartoe gelei dat hy die hoë Sweedse belastingtariewe probeer vermy het. So het hy tussen 1976 en 2014 in Epalinges naby Lausanne in die Switserse kanton Vaud gebly en eers ná die afsterwe van sy vrou na Swede teruggekeer. In 1982 is Ikea omgeskep tot 'n stigting wat sy setel in Nederland het. Verskeie dogtermaatskappye is in Luxemburg en Liechtenstein geregistreer. Reeds sedert 1988 was Kamprad nie meer regstreeks by die bestuur van Ikea betrokke nie, maar het hom beperk tot die rol van raadgewer.[4]

Ingvar Kamprad, wat deur sy onderneming as "een van die vernaamste entrepreneurs van die 20ste eeu" beskryf is, is volgens 'n Ikea-persmededeling op 27 Januarie 2018 ná 'n kort siekte op die ouderdom van 91 in vrede in sy huis in die Sweedse provinsie Småland ontslape.[5]

Verwysings wysig

  1. (en) "INGVAR KAMPRAD, FOUNDER OF IKEA", sweden.se; besoek op 28 Januarie 2018.
  2. "He lives in a bungalow, flies easyJet and 'dries out' three times a year... the man who founded Ikea and is worth £15bn". Daily Mail (in Engels). London, UK. 14 April 2008. Geargiveer vanaf die oorspronklike op 3 Desember 2019.
  3. Bloomberg.com: Billionaires. Besoek op 28 Januarie 2018
  4. Süddeutsche Zeitung, 28 Januarie 2018: Ikea-Gründer Ingvar Kamprad mit 91 Jahren gestorben. Besoek op 28 Januarie 2018
  5. The Guardian, 28 Januarie 2018: Ikea founder Ingvar Kamprad dies aged 91. Besoek op 28 Januarie 2018

Eksterne skakels wysig