Kaap Lopez
Kaap Lopez in Gaboen is die westelikste punt van Afrika suid van die ewenaar en die suidelike eindpunt van die Baai van Biafra.
Ligging wysig
Die kaap lê by 0° 38′ suid en 8° 42′ oos op 'n sanderige skiereiland by die mond van die Ogoouérivier en 10 km van Port-Gentil. Die delta bestaan uit 'n netwerk van natuurlike kanale, strandmere, eilande en ekwatoriale bosse. Die skiereiland is 55 km lank en skei die Golf van Guinee van die suidelike Atlantiese Oseaan. Seestrome loop van wes na oos en verlangsaam hier sodat baie fyn sand aan die ooskus neergeslaan word.
Geskiedenis wysig
Die kaap is in 1474 deur die Portugees Lopes Gonçalves besoek en in 1602 was die Nederlander Pieter de Marees daar. Jare lank was die kaap en die baai die tuiste van seerowers. Van 5 tot 10 Februarie 1722 vind die Seeslag van Kaap Lopez plaas. Die Britse oorlogskip HMS Swallow onder kapt. Chaloner Ogle verslaan die seerowers onder Bartholomew Roberts met hul skepe Ranger en Royal Fortune. Roberts kom in die gevegte om. In die 1870’s loods die Franse ontdekker graaf Savorgnan de Brazza sy reise na die onbekende dele van Afrika van hier uit. Die eerste vuurtoring op die kaap dateer uit 1897 en dit is in 1911 vervang. Dit staan tans in onbruik. Eers in 1957 is die hawe ontwikkel en tien jaar later is 'n olieraffinadery gebou.
Bibliografie wysig
| Wikimedia Commons bevat media in verband met Kaap Lopez. |
- Green, Lawrence G.: Under a sky like flame. Kaapstad: Howard B. Timmins, 1954.
- indianajones.fandom.com
- setec.fr