Kleinbosch-begraafplaas

In die Kleinbosch-begraafplaas (ook bekend as die Du Toit-begraafplaas) by die Paarl lê Hugenote en bekende afstammelinge van Hugenote begrawe. Dit lê tussen koejawelboorde op die plaas Kleinbosch (tans Augusta Kleinbosch) aan Kleinboschweg in Daljosafat. In die begraafplaas is ‘n gedenkteken vir die lede van die Genootskap van Regte Afrikaners, naamlik ds. S.J. du Toit, sy ouer broer D.F. du Toit (oom Lokomotief), P.J. Malherbe, G.J. Malherbe, D.F. du Toit (Danie Dokter), S.G. du Toit, C.P. Hoogenhout en ds. August Ahrbeck.

Ds. Du Toit, D.F. du Toit (D.F. seun) en P.J. Malherbe lê hier begrawe. Ook is hier die grafte van Martha, die suster van Piet Retief, die skrywer D.P. du Toit en die grondlegger van die moderne wynbou in Suid-Afrika en bekend om pinotage-wyn, Abraham Izak Perold. Die begraafplaas is reeds in 1692 deur die Hugenote-stamvader Francois du Toit op sy plaas aangelê. In 1942 is die begraafplaas tot monument verklaar. Op hierdie plaas is ook die historiese Gedenkschool der Hugenoten.