Leeudoringstad-spoorwegramp
Die Leeudoringstad-spoorwegramp in 1932 was een van die grootste ontploffings wat ooit in Suid-Afrika plaasgevind het.
Elke Vrydag het 'n trein, gelaai met dinamiet wat by die De Beers-plofstoffabriek in Somerset-Wes vervaardig is, van die stasie by Firgrove na die goudmyne van die Witwatersrand gery.
Op Sondag 17 Julie 1932 het hierdie trein soos gebruiklik verby die plaas Louwpan, skaars 'n kilometer wes van Leeudoringstad, verbygegaan. Die vrag van 312 ton op 34 waens het bestaan uit dinamietkerse in kissies, lonte en slagdoppies. Verder was daar ses waens met kunsmis en twee met appels.
Waarskynlik het oorverhitting van 'n wielas die brand veroorsaak. In die ontploffing wat daarop volg, het vyf mense gesterf en elf is ernstig beseer. ‘n Kudde van 25 beeste het gevrek. Byna geen gebou in die dorp het ongeskonde gebly nie en byna die hele dorp moes herbou word. 'n Sloot van 30 m lank en op plekke tot 5 m diep was die gevolg, benewens die verlies van 300 m spoorlyn. Wrakstukke van die trein is tot 10 km ver van die ramptoneel aangetref en die slag is tot so ver as Kokstad en Pietersburg gehoor.
As hierdie ontploffing slegs enkele minute later gebeur het, sou dit die hele Leeudoringstad uitgewis het en sou die lewensverlies besonder hoog gewees het.