Letta Rhoda (Lettie) Fouché (Lady Grey, Kaapkolonie, 23 Mei 1900Strand, 11 Junie 1993) was die eggenote van die tweede staatspresident van Suid-Afrika, adv. Jim Fouché.

Kabinetsvroue van Suid-Afrika, 1967. Lettie Fouché sit links.
Lettie Fouché, omstreeks 1962.
Adv. Jim en mev. Lettie Fouché kom op 10 April 1968 by die Groote Kerk aan vir sy inhuldiging as staatspresident van Suid-Afrika.
Suid-Afrika se nuwe staatspresidentspaar op die voorblad van Huisgenoot, 1 Maart 1968.

Lettie Fouché is tydens die Tweede Vryheidsoorlog in die Noordoos-Kaap gebore as ’n dogter van mnr. en mev. T.S. McDonald van Zastron in die Suidwes-Vrystaat. Sy het haar opleiding aan die Hoërskool Zastron en die Universiteit van Stellenbosch ontvang, waar sy in die vrouekoshuis Greylock was. Op universiteit het sy kunsvakke, musiek en sang studeer. Sy is in 1920 met Jim Fouché getroud, ’n boorling van Wepener, waar hy indertyd geboer het. Haar man was ’n jarelange lid van die Nasionale Party en stoere republikein. Nadat hy hom as advokaat bekwaam het, het hy van 1954 tot 1959 as administrateur van die Oranje-Vrystaat gedien, toe hy tot die kabinet bevorder is as minister van verdediging. In 1966 het hy minister van landbou-tegniese dienste geword en in 1968 van waterwese. Nadat die aangewese staatspresident dr. Eben Dönges op 10 Januarie 1968 oorlede is voor hy ingehuldig kon word, is mev. Fouché se man in sy plek aangewys en op 10 April 1968 ingehuldig. So het sy die tweede staatspresidentsvrou van Suid-Afrika geword, ’n rol wat sy van 1968 tot 1975 vervul het. Haar man was die enigste seremoniële staatspresident wat sy volle ampstermyn van sewe jaar uitgedien het.

Twee seuns is uit die huwelik gebore, naamlik dr. Jacobus Johannes (Bux), wat getrou het met Coreen Louw, en Etienne. Bux Fouché het as ambassadeur gedien in Den Haag, Nederland van 1965 tot 1968. Hy is oorlede op 2 Oktober 1982. Twee kinders is uit sy huwelik gebore: Jacobus Johannes (Jimmy) Fouché en Jacobus Adriaan Louw (Koos) Fouché. Jimmy het getrou met Elsabé van Veen, en hulle het drie kinders gehad: Hanneline, Coreen en Bux. Koos het getrou met Edé Janse van Rensburg en het twee kinders gehad: Jeanne en Jacobus Johannes (James), 'n dokter in Utrecht, Nederland.

Lettie Fouché het in verskeie besture van die Vrouelandbou-unie gedien, veral te Rouxville. Sy was voorsitter van die afdelingsbestuur van die ou Nasionale Party asook van die vroueafdeling daarvan. In 1942, toe haar eggenoot tot LV vir Smithfield verkies is, moes sy hierdie aktiwiteite staak weens die veelvuldige pligte wat sy toe moes behartig tydens die parlementsitting in Kaapstad. In Januarie 1951 het hulle na Bloemfontein verhuis om in Vrystaatse Huis te gaan woon ná haar man se aanstelling as administrateur.

Al die jare was Lettie Fouché se groot belangstelling sang en sy het dikwels op byeenkomste gesing. Een van haar seremoniële pligte as administrateursvrou was dat die werk in verband met die VLU-takke in die Oranje-Vrystaat ampshalwe op haar skouers gerus het.

Ná haar man se dood in 1980 was sy 13 jaar lank weduwee.

Bronne wysig

  • (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.
  • (af) Van Schoor, A.M. (red.) 1973. Die Nasionale boek, gewy aan 25 jaar van Nasionale bewind (1948–1973). Johannesburg: Edupress (Edms.) Bpk.