Life (tydskrif)

Life was van 1883 tot 1972 'n Amerikaanse weektydskrif, tot 1978 'n "spesiale tydskrif" wat van tyd tot tyd gepubliseer is en van 1978 tot 2000 'n maandtydskrif. Gedurende sy goue tydperk van 1936 tot 1972 was dit 'n weeklikse tydskrif van algemene belang en met 'n wye strekking wat bekend was vir die gehalte van sy fotografie.

'n Voorblad van Life uit 1911.

Life was vir die eerste 53 jaar van sy bestaan, tot 1936, 'n onafhanklike tydskrif met artikels van algemene belang en die klem op ligte vermaak, met baie illustrasies, grappe en sosiale kommentaar. Van die bekendste skrywers, redakteurs, illustreerders en spotprenttekenaars van dié tyd het vir die tydskrif gewerk: Charles Dana Gibson, Norman Rockwell en Jacob Hartman jr. Gibson het die tydskrif se redakteur en eienaar geword ná John Ames Mitchell se dood in 1918.

In 1936 het die destydse uitgewer van Time, Henry Luce, Life gekoop net omdat hy die naam wou hê. Hy het die tydskrif heeltemal herontwerp. Life het die eerste Amerikaanse nuustydskrif met net foto's geword en dit het die mark dekades lank oorheers. In 'n stadium is meer as 13,5 miljoen eksemplare per week verkoop. Die bekendste foto wat in die tydskrif gepubliseer is, was waarskynlik Alfred Eisenstaedt s'n, "V-J Day in Times Square", van 'n verpleegster in 'n matroos se arms wat op 14 Augustus 1945 in New York geneem is terwyl die oorwinning oor Japan in die Tweede Wêreldoorlog gevier is. Ander bekende fotograwe wat vir die tydskrif gewerk het, was Robert Capa, Margaret Bourke-White, Lee Miller, Gordon Parks en Henri Cartier-Bresson.

Ná 2000 het Time Inc. nog die naam Life vir spesiale uitgawes gebruik. Dit is weer gereeld gepubliseer toe dit van 2004 tot 2007 'n weeklikse koerantbylae was.[1] Dit het daarna finaal toegemaak. Life se foto's is tans te sien op die webtuiste Life.com.[2]

VerwysingsWysig

  1. Time Warner (26 Maart 2007). "Time Inc. to Close Life Magazine Newspaper Supplement". Persberig. 
  2. "End comes again for 'Life,' but all its photos going on the Web". USA Today. New York. 26 Maart 2007.

SkakelsWysig