Likiditeit of likwiditeit is 'n maatstaf van die vermoë van 'n debiteur om hul korttermynskuld betyds te betaal. Dit word gewoonlik as 'n verhouding of 'n persentasie van bedryfslaste uitgedruk. Daar is verskeie weergawes van hierdie rekeningkundige kengetal, nl.:

  • Die bedryfskapitaalverhouding of bedryfsverhouding is die eenvoudigste likiditeitsmaatsaf en word bereken deur die totale bedryfsbates deur die totale bedryfslaste te deel. 'n Verhouding of persentasie van meer as 1:1 of 100% is algemeen vir nie-bankondernemings. Let egter daarop dat sommige bedryfsbates nie in 'n haas teen die volle markprys van die hand gesit kan word nie.
  • Die vuurproefverhouding of vinnige verhouding word bereken deur voorraad en voorafbetaalde uitgawes van bedryfsbates af te trek en die verskil deur bedryfslaste te deel. Hierdie verhouding gee 'n indruk van die vermoë van 'n onderneming om bedryfslaste te dek met bates wat geredelik vervreem kan word. Dit berus dus op die veronderstelling dat voorraad nie geredelik gelikwideer kan word nie, wat 'n redelike veronderstelling in die meeste bedrywe is..
  • Die bedryfskontantvloeiverhouding word bereken deur die bedryfskontantvloei deur bedryfslaste te deel. Hierdie maatstaf gee 'n indruk van 'n onderneming se vermoë om bedryfslaste met bedryfsinkomste te dek, eerder as om nie-voorraadsbedryfsbates vir daardie doeleinde te likwideer.

Sien ook wysig