Linen Hall Library

Die Linen Hall Library is die oudste biblioteek in Belfast, Noord-Ierland, en die laaste intekenbiblioteek op die eiland Ierland.[1] Die biblioteek, wat in 1788 gevestig is, is gegrond op die radikale en verligte gedagtes van sy ontstaanstyd en het van begin af sy onafhanklikheid gehandhaaf as 'n instelling waarvan die bates in besit moet bly van die gemeenskap.

Linen Hall Library op Belfast se sentrale Donegall-plein Noord
Die biblioteek se gerieflike leessaal

Die biblioteek bewaar die mees omvangryke versameling van publikasies in die veld van Ierse en plaaslike studies (Irish and Local Studies Collection), waaronder historiese boeke wat in Belfast en die res van Ulster gedruk is, en 250 000 boeke en ander media in die Noord-Ierse Politieke Versameling (Northern Ireland Political Collection), die omvattendste argief oor die politieke onluste in Noord-Ierland. 'n Ander beduidende en unieke argief het Noord-Ierse toneelkuns en uitvoerende kunste as onderwerp (Northern Ireland Theatre and Performing Arts Archive).

Andrew Gibson, 'n boorling van Ayrshire in Suidwes-Skotland wat hom in Belfast gevestig en hier as goewerneur van die Linen Hall Library en as een van die eerste voorsitters van die Belfast Scottish Association gedien het, was 'n entoesiastiese aanhanger van Robert Burns se digkuns. Sy versameling van meer as 2 000 boekdele van Burns-werke en Burnsiana is in 1901 deur publieke subskripsie aangekoop en word sedertdien in die Linen Hall Library bewaar. Dit is een van die grootste versamelings oor Skotland se nasionale digter.[2]

Die Linen Hall Library dien naas sy funksie as biblioteek as belangrike kulturele sentrum in die Noord-Ierse hoofstad waar maandeliks uitstallings gehou asook lesings en voordragte aangebied word.

Verwysings wysig

  1. Linen Hall Library: About Us. Besoek op 16 Mei 2017
  2. Ulster-Scots Network: Burns - The Ulster Connection. Belfast (sonder jaargetal): Ulster-Scots Network/Ulster-Scots Agency, bl. 6

Eksterne skakels wysig

Koördinate: 54°35′51″N 5°55′54″W / 54.59750°N 5.93167°W / 54.59750; -5.93167