Lisa Hall

Lisa Hall is ’n aktrise en dramaturg.

Lewe en werk

Lisa Hall is gebore van Engelse ouers wat albei van die Karoo kom, maar baie van haar skryfwerk is in Afrikaans. Sy studeer vanaf 1986 aan die Universiteit van Kaapstad, waar sy in 1989 'n tweetalige Diploma in Drama verwerf. In hierdie tyd is sy aktief betrokke in alle fasette van die drama en speel onder andere in 1987 in ’n opvoering getiteld “Dubbelspel” (Eugène Ionesco  se “Die kaalkop prima donna” en Robert Anderson se “Ek is Herman”). In 1988 kry sy haar eerste benoeming vir ’n Fleur du Cap-toneelprys as belowendste student en die volgende jaar word sy weereens vir hierdie toekenning benoem. Sy tree in 1988 ook op in die dansproduksie “Footage”, waarvan sy ’n deel self choreografeer. Aan die begin van 1990 verhuis sy na Johannesburg en word beroepsaktrise. Hier trek sy aandag met die solo-opvoering “I can’t wait to tie you to the sofa”, terwyl sy ook regisseur is van die opvoering van haar eie drama “A far cry from home”. ’n Ander drama uit haar pen is “Die hoenderhok ‘war’” en sy is mede-regisseur van die opvoering daarvan. Ander verhoogoptredes sluit in rolle in opvoerings van “I am Herbert” en “Lysistrata”. Wanneer die aanvraag na haar dienste vir dramas ietwat opdroog, verdien sy geld deur die skryf van kopie vir advertensies.

Skryfwerk

Haar eerste skryfsukses is in 1986, toe sy as eerstejaar student naaswenner is van ’n kortverhaalwedstryd in Fair Lady. Haar drama “Klaaglied vir ’n kunstenaar” word in 1988 op Kampustoneel, die Universiteit van Kaapstad Kleinteater en die Grahamstadse Kunstefees opgevoer. Hierin beeld sy ’n tiener se traumatiese verlies van onskuld op ’n oorspronklike manier uit en maak effektief gebruik van ritueel. Dit is ook ’n gewaagde uitbeelding van homoseksualiteit in ’n tyd toe hierdie tema nog nie oopgeskryf is nie. “Die hoenderhok ‘war’” debuteer in 1990 in Johannesburg en word by Kampustoneel opgevoer deur die Universiteit van Kaapstad. Hierdie satire bied ’n nuwe perspektief op ’n holrug geryde tema, waar ’n Boere-ouma en vier “kinders” hul vesting en Afrikaner-waardes teen die bedreiging van die nuwe Suid-Afrika verdedig.

Sy skryf ook verskeie Engelse dramas. In 1989 word die eenbedryf “Solo in tandem” by die Grahamstadse Kunstefees opgevoer en “A far cry from home” debuteer in 1990 in Johannesburg. “Wild lives” is in 1991 die Kaapse streekwenner van die jaarlikse SAKRUK-toekennings. Die drama speel af in die bosveld, waar die beskawing se gewoontes en obsessies ontuis is en die natuurwette oorheers. Hierdie kwessies en hulle inherente konflikte word in die drama ondersoek.

In 1991 wen sy Tafelberg-Uitgewers en Sanlam se Jong Stemme-kompetisie vir skrywers tussen 18 en 25 jaar met ’n kortverhaal “God forgot”, nadat sy in 1990 ’n finalis in hierdie kompetisie was met ’n Afrikaanse skets.

Bronnelys

Boeke

• Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998 Tydskrifte en koerante
• Van den Berg, Zirk “Daardie veelsydige jong Lisa Hall” “Die Burger” 27 Julie 1991

Internet

• Esat: http://esat.sun.ac.za/index.php/Lisa_Hall
• Hefer, Stefanie Die Burger: http://152.111.1.87/argief/berigte/dieburger/1987/09/01/9/2.html
• Van den Berg, Zirk Beeld: http://152.111.1.88/argief/berigte/beeld/1991/07/27/3/12.html